Specialista di mercado financiero ta señala cu e bononan di Pdvsa a cay te na e minimo historico di 8 cent di dollar, mientras tin otro cu ta vence prome, cu a keda na 9 cent.
Di acuerdo cu agencia Bloomberg, e operadornan consulta a señala cu e benta masal a ser inicia pa e miedo cu OFAC no lo a extende e periodo di likidacion di cierto transaccion Venezolano despues di awe, 30 di september. Esey lo significa cu e bononan lo keda atrapa cu nan anotacion abao a largo plazo.
Di otro banda, produccion den Faha di Orinoco a cay te na 246.000 bari pa dia (bpd) siman pasa, na solamente 18,9% di e capacidad maximo di 1.3 miyon bpd. Dia 18 di september ainda produccion tabata na 370.000 bpd, segun un informe tecnico cu S&P Global Platts a haya pa mira.
E nivel di produccion di Pdvsa y nan socionan internacional den Faha di Orinoco ta sigui cay pa motibo di e falta di barco pa exporta crudo y un falta di mas posibilidad pa almacena crudo, tanto riba tera como riba barco dilanti costa.
Pdvsa no tabata disponible pa comentario di inmediato di agencianan specialisa.
Tambe Pdvsa tin problema pa procesa crudo internamente. E unico refineria operando na Amuay a keda paralisa despues di problema cu electricdad despues di mal tempo siman pasa y candela den e planta di ‘hydro-processing’. A logra restablece suministro di coriente pero den fin di siman ainda no a cuminsa opera.
Prome cu e incidentenan di siman pasa Amuay, cu capacidad di mas di 600.000 bpd, tabata na un tercio di su produccion, cu un planta di destilacion, e ‘catalytic cracker’ y e planta di hydro-desulfurization’ cu a pega candela.
