Campeonato di Aruba Softball Fast Pitch femenino U17 ta drentando su recta final. Eagles di San Nicolas ta enfrentando Rockets di Sta Cruz den e serie final esta playoff di best out of 3 pa disputa pa e titulo maximo, esta campeon di Aruba.

Eagles, kendenan a yega final invicto, ta keda faborito; pero manera nan ta bisa, e bala ta rondo y esun cu hunga e serie miho lo bay cu e titulo.

Eagles ta anota 6 careda den bom di prome inning y ta amplia cu 1 careda mas den bom di 2 inning. Den cabes di tres inning, Rockets ta menasa y ta anota 1 careda, mientras Eagles ta responde cu 4 careda mas den bom di 4 inning pa seya e prome victoria di e playoff final.

Eagles 11 careda, 9 hit, 1 eror y ta laga 3 coredo na base.
Rockets 1 careda, 0 hit, 4 eror y ta laga 4 coredo den circulacion.

Miho batiadonan pa Eagles ta Keyla Cham 3-2 incluyendo un doblete, Destiny Johnson 3-2 cu un doblete mas 2 rbi y 2 careda anota, Myah Thompson di 3-1 cual bataso tabata un doblete, Ashmilayne Maduro di 3-1 cu un triple, Zoe Emen 2-1 cu un triple mas 2 rbi, Thulaika Rodgers y Jalliyah Versprey di 2-1.

E strea di apenas 16 aña, Yei Mei ‘Beba’ Cheong ta lansa un ‘no hitter’ den un forma impresionante, dominando Rockets por completo, seyando e victoria riba su nomber. Alabes ta pone su mes como contendiente pa un MVP di e serie final. Beba Cheong a enfrenta 17 batiado lansando 25 bola, 36 strike pa un total di 61 pitch, no ta permiti hit, ta ricibi 1 careda sushi contra ponchando un total di 6 batiado y ta regala 4 base por bola y por mira atras riba un prestacion excelente.

Jaysjelienne Kock ta resulta pitcher perdedo, lansando 35 bola, 41 strike pa un total di 76 pitch permitiendo 11 careda tras di 9 hit y ta regala 2 base por bola.

Por mira bek riba un tremendo campeonato U17 femenino unda atletanan ta competiendo na un manera sano contra otro riba un bon nivel. Claro tin espacio pa mas desaroyo, pero por premira un campeonato U17 mas grandi pa 2020.

Cu e resultado aki Eagles ta na 1 wega di e titulo y Rockets ta lomba contra muraya y mester un victoria pa extende e serie.