Ruthy ‘Lady Ruth’ Vrieswijk-Bergen: Bon Dia Yen Di Alegria !

Ahaaaaaa! Ya e luna di september tambe ta tra’i lomba y nos ta drentando e luna di flor, e luna di gracia, e luna di october. Y Diabierna Dia 4 Di October ta Dia di Bestia, ‘Dierendag’ y ta hopi ta esunnan cu tin un bestia di cas, nan ‘pet’ cu nan ta stima.

Tin cu ta stima nan ‘pet dog’ mas cu nan ta stima hende. Bo ta ripara na nan postnan riba Facebook mas tanto. Ta nan escogencia, talbes, despues di a wordo decepciona y herida door di nan partner of door di hende rond di nan cu nan a bolter draai nan amor awor pa un bestia.
Pero locual Lady Ruth no por compronde y of acepta ainda totalmente ta, cu toch hopi no ta cuida nan bestianan den nan cura y cada biaha por lesa riba Facebook cu tal y tal cacho di tal y tal tamaño y color a perde den vecindario tal y tal. Si bo ta stima bo bestia di cas di berdad, bo ta cuid’ele mas miho cu ta posibel, toch?

Antes, cu nos no tabatin un of mas cacho, e cachonan di nos bon bisiñanan tabata bin den nos cura pa pishi y pupu. Nan a tribi bay asina leu pa drenta veranda un biaha y pishi na e pianan di stoel. Nos a papia varios biaha cu nos bisiñanan na bon, pidi nan encarecidamente pa tene nan cacho den nan cura, pero nada. E ora nos a fada y nos a yama polis pa nan. Ta net den e dianan cu segun noticianan, nan tabata tratando e ley di cacho. Despues si nan a haci nan best pa a tene nan bestianan den nan cura, y nos no a wordo molestia mas pa e cachonan ey. Tin biaha tin pushi cu tambe ta pasa keiro den nos veranda. Naaaaaah, ami si no lo core duna nan cuminda y of core yama y of pone algo riba Facebook pa esunnan cu a perde nan pushi of cacho pa pasa busk’ele cerca nos. Manera nan a bin, nan mes ta bay. Sorry shonnan, pero ami si no ta un dierenvriend grandi. Mi ta gusta wak nan, tin biaha caricia nan, ora nan ta bestianan di amiganan of hendenan conoci cu tin nan pet bon cuida y bon teni den nan cura.

E motibo por ta tambe cu mi ta alergico pa e lananan. Hopi aña pasa, un di e cachonan di un di mi welanan ( awe den feliz memoria ) a bula riba mi hera rasca mi lomba, spanta mi masha hopi mes. Den Dakota y Tarabana pabao por wak cacho ta cana los ariba caya aki aya, asina mes cu tin e ley di cacho pa tene bo bestia den bo cura.

E vetirinarionan lo tin nan mannan yen di trabao pa sterilisa e bestianan cu nan ta piki aki aya fo’i riba caya. Asina toch nan ta yuda di preveni cu e bestianan aki ta multiplica cada biaha atrobe.

Lady Ruth tabatin un par di ‘goud visjes’ como su petnan na cas, pero despues di basta tempo nan a muri. Tabata bunita pa wak nan den nan comchi grandi, landa den tur libertad, sin miedo pa wordo comi door di un otro pisca mas grandi. De bes en cuando nos sa pone sucu cu awa pa e paharitonan chikito, manera bariga geel, pero ora cu e muraya a keda tur sushi di nan pupu, nos a stop di haci esey tambe. Awor mi tin un ‘vogel huisje’ chikito pa laga colga den palo of den garashi. Mi gusta tende e paharitonan fluit. Mi gusta wak trupial y tende nan fluit. Mi ta contento cu mi palo di mispel den cura, cu e paharitonan por come. Mi ta kere cu nan ta gusta mispel anto, mi no sa.

Shonnan, si boso tin bestianan di cas, cuida nan bon y tene nan den boso cura patras den nan cas of paden ora bo tin cu habri e heki di garashi pa sali y despues pon’ele bek den cura.

Pasa un feliz y bon siman yena di salud, amor y alegria! Gosa di bo ‘pet’ of ‘petnan’ y corda trata bo prohimo bon tambe. Ta tur creacion mester di amor y bon cuido, no solamente nos flora y nos fauna, pero universo henter! Danki pa tene nos planeta limpi. Por fabor no tira sushi di plastic y of boter den lama. Ni riba caya. P’esey tin bari di tira sushi aden. Danki pa lesa nos relato cu atencion atrobe y danki pa ta un bon ehempel pa nos tur! Love you too!