Diabierna ultimo a tuma luga un conferencia di prensa, caminda Comerciante Uni Aruba (CUA) a duna nan punto di bista pa loke ta e decision cu lo drenta den vigor na october, pa kita BBO for di recibo y agrega esaki na e prijs.
Frans Ponson, miembro di CUA ta bisa cu ta respeta e punto di minister di finanzas tocante cu a tende for di gremio. Sinembargo e ta bisa cu den e reunion cu stakeholders cu ATA, AHATA, ATIA, KvK, y Comerciante Uni, ta bisa cu ningun gremio a pidi pa esey.
Ponson ta remarca cu tur gremio a pidi laga mustra e impuesto riba e recibo. “Nos tur sa na Aruba cu 80% di frankisia di Merca y Canada, unda cu nos ta paga comision di benta. Awo cu BBO ta hinca den e prijs, nos sa cu tin cu paga mas. E frankisia a acerca comerciante pa propone un aumento di prijs di 8% pa 15%.”
Esey nan ta propone comerciante di Aruba, cu pa subi prijs nan ta bay cobra mas tambe. E ta bisa cu ta obvio cu ‘gobierno no tin pueblo na pecho’. Pa motibo di capricho di dos hende den gobierno, ta bay castiga pueblo cu temporada di fiesta y cu prijs ta bay subi drasticamente.
E ta bisa cu locual Aruba ta haciendo ta mescos cu Corsou a haci, cu tin un 22% di desempleo y a haya dos KB, ‘anto net Corsou nan ta copia?’
“Atrobe mi ta bisa, ami n’ sa pakico. Bisa cua ta e gremio cu a bay di acuerdo, pasobra den reunion ningun gremio a acepta. Keho so nos a tende di pueblo”, Ponson a splica. Den e parti di splica e prijs den recibo, e ta bisa cu algun comerciante so por hacie pasobra ta crea gasto y software Mericano no por. Ponson ta bisa cu tin software di Australia cu por hacie, pero esey ta costoso, ya cu e ta un software special cu compania grandi ta traha cune.
Tambe el a bisa cu den industria turistico Aruba lo subi mas den e service charge den tax y 15% riba e tax. “Nos ta respeta nos minister su decision, pero nos no ta acuerdo cune. Pueblo ta bay carga cu consecuencia.”
