E supuesto retiro repentino di Randall Croes como miembro di directiva di Camara di Comercio y Industria, a resulta di ta ‘fake news’. Asina Bon Dia Aruba a haya di tende di e conocido economista mes den un entrevista telefonico.
“Mi a anuncia mi retiro na luna di juni caba; tur hende den e directiva tabata sa cu mi no lo sigui pa un periodo nobo di tres aña na 2020. Sin embargo, mi a dicidi di keda algun luna mas, pa apoya KvK den e deliberacionnan cu Ministerio di Finanzas pa loke ta e Reforma Fiscal y e posicion cu KvK lo a tuma den esey. Mirando cu gobierno no ta cambia di posicion pa loke ta e BBO riba factura si of no, y a yega na e deadline di 1 di october den e deliberacion aki entre gobierno y gremio, mi tarea a termina aki, y mi a notifica esey, as simple as that.”
Ta keda e punto pakico tabata necesario pa corespondencia confidencial di KvK a termina den man di e portal di noticia cu a publica esaki seguidamente. E no kier a comenta mas aleu riba e hecho aki, ni pensa riba ken den e organisacion a haya necesario pa viola confidencialidad interno di e organisacion, pero si tabata dispuesto pa comparti cu nos e prueba di e email cu el a manda pa Camara di Comercio dia 26 di juni di e aña aki, unda el a anuncia e no ta bay ta candidato pa un termino nobo di tres aña.
“Mi a dicidi di antemano caba cu lo mi a dedica tres aña di mi tempo na aporta na Camara di Comercio, cu mi ta considera importante pa sector priva. Sin embargo, mi tin hopi otro organisacion den cual mi ta aporta y mi kier enfoca riba otro asunto cu ta rekeri mi atencion, banda di mi trabao (di general manager; red.) na Sagicor.”
