Na comienso di e siman di Asamblea General na Nacionnan Uni na New York, Prome Minister Evelyn Wever-Croes a reuni cu lidernan femenino y ehecutivonan di Wall Street y sector priva, unda cu el a presenta e vision di Aruba pa desaroya pilarnan nobo di economia, y particularmente un economia di conocemento. Den e seno aki a explora colaboracion nobo, den cual Aruba por ofrece un situacion di bentaha mutuo pa inversionistanan cu ta sostene desaroyo sostenibel.
Segun un comunicado di gobierno, tin hopi interes y oportunidad pa partner cu Aruba riba tereno di social innovacion pa desaroya solucionnan pa retonan riba tereno di educacion, futuro di trabou, cambio di clima y derecho di hende muhe. E evento a wordo haci posibel danki na Fiduciary Trust International.
“Esaki tabata un desayuno combina cu un reunion cu mi a organisa na unda cu mi a comparti e historia y visionnan di Aruba cu esunnan presente y na unda mi a haya e oportunidad tambe pa scucha si nan tin interes den Aruba pa yuda crea desaroyonan, specialmente den tecnologia, pa asina crea mas transparencia y integridad. Cu e reunionnan aki, Aruba ta wordo promove mas ainda cu e speransa cu nos lo haya ayudonan pa crea mas desaroyo y posibilidad pa nos pueblo”, Wever-Croes a duna di conoce.
A reitera e importancia di ta parti di Reino.
Un siman, Wever-Croes a expresa, cu reunionnan y eventonan fuerte, largo pero hopi fructifero pa nos pais, caminda cu ta formando parti di e delegacion di Reino cu ta consisti di Su Mahestad Willem-Alexander, Reina Maxima, e 4 Prome Minister di Reino Hulandes y algun Minister den Reino.
Entre tur e reunionnan na New York, tabatin un reunion cu Rey Willem-Alexander. Tur 4 Prome Minister di Reino tabata den e reunion aki. Esaki, segun Wever-Croes ta considera, tabata un reunion importante den cual a reitera e importancia di ta parti di Reino.
“Di mi parti, mi a trece padilanti cu nos ta trahando duro pa logra e metanan financiero proponi den e protocol, loke nos mester ta tempo y espacio. No ta facil pero nos ta bayendo den bon rumbo y mas importante, nos ta atendiendo e retonan nos dilanti. Nos ta trahando tambe riba logra un presupuesto balansa pa prome biaha den hopi tempo. Esaki lo trece trankilidad den termino mediano y largo y Hulanda ta realisa esaki tambe. E reunion a bay hopi bon, cu bon palabracionnan pa futuro”, Wever-Croes ta finalisa den e comunicado.
