Liderazgo ta un clave hopi importante pa un compania, departamento of un proyecto lo por funciona. Sinembargo pa haya personanan cu por desaroya esaki no ta facil. Un lider mester tin un conhunto di habilidad cu ta sirbi pa influencia otro personanan den nan manera di pensa of actua.

Durante un conferencia di prensa ayera atardi, Shelby Maduro y Edsel Lopez di Grant Thornton a splica cu hopi compania na Aruba tin necesidad pa bin cu un tipo di crecemento of desaroyo pa tur persona cu ta yegando na posicion di lider, manera supervisor of manager na su trabou den ramo di liderazgo.

Edsel Lopez, cu ta partner di Grant Thornton, a conta cu awendia hopi compania ta trece dilanti cierto temanan y a base di esakinan y cu e experiencia cu e compania aki tin na Aruba, e programa ta bon pa e futuro lidernan cu por cuminsa desaroya nan mes, pa pronto nan por asumi un responsabilidad un tiki mas halto.

E training ta importante pa motibo cu hopi biaha na Aruba no tin e tipo di e training aki. “Nos kier motiva nan y yuda e young profesionals” a traves e programa cu e compania ta ofrece.

Shelby Maduro, Senior Manager, a duna di conoce cu esaki ta un programa den cual e ta yuda e personanan. Por ehempel ora nan ta haya un conflicto na nan trabou, of nan mes tin cu siña con maneha nan tempo pa motibo cu trabou ta abarca hopi tempo y responsabilidad, pero nan no sa con por haci na e momentonan ey.

Tambe Maduro a bisa cu pa e personanan kende ta den posicion di liderazgo cu mester motiva y inspira su hendenan, tur esaki ta topiconan cu e programa ‘Professional Development’ ta trece dilanti y asina e companianan por ofrece un training pa nan empleadonan.

Maduro a informa cu e programa ta presenta diferente herment, manera inteligencia emocional, maneho di conflicto, liderazgo creativo, coaching, entre otro; tur herment cu un lider mester tin den era actual.

E programa lo dura un aña y ta depende di e compania mes ki tempo nan lo kier cuminsa. Ta componi di 10 tayer di tres ora parti den aña. Tambe tur esunnan cu ta participa ta ricibi coaching di un ora na cada kwartaal y tambe e training. Tin casonan cu e participantenan por traha den su tempo liber pa por practica.

Maduro a expresa cu esaki ta pone e organisacion pensa riba nan futuro, ken lo ta e lidernan di futuro y ora nan sa cua di nan ta e lider, por cuminsa training y prepara pa nan funcion. Ora nan ta culmina cu e programa ta haya un certificado di participacion.

Ta existi informacion di loke ta bon y ta malo den materia di liderazgo, p’esey ta importante pa conoce cu no ta tur persona cu tin un funcion halto ta un lider. Mayoria di lider semper ta dispuesto pa yuda y colabora cu su ekipo pa haci un impulso na su manera di pensa.

Na Aruba, cu ta un isla turistico cu variedad di hotelnan, esaki ta importante pa lidernan den e sector, pa motibo cu e topiconan ta pa relata e habilidad cu e persona mester como lider.

Pa e motibo aki, Maduro a bisa cu talento humano den organisacionnan ta e variabel mas importante y valioso cu cualkier organisacion por tin. P’esey nan mester inverti den su formacion y capacitacion. Na prome luga, tin cu selecciona e profiel cu e compania ta pensa cu tin potencial den nan areanan y division cu ta yuda haya e meta. Unabes cu ta forma parti di ekipo di hotel, nan mester inverti den dje pa nan sigui evoluciona, crece profesionalmente y cu esey e compania, den caso di Aruba specificamente hotelnan, por ofrece un miho servicio y e turista lo regresa den otro biaha.