Durante e ultimo conferencia di prensa cu minister di Finansa, Asuntonan Economico y Cultura, Xiomara Ruiz-Maduro a ofrece pa comunidad y medionan local, el a splica e rumornan cu dianan pasa e comunidad a haya tocante un belasting adicional cu ta ‘Vermogensbelasting’.
Tocante esaki, Ruiz-Maduro a comenta cu un biaha mas nan a haya nan mes confronta cu un ‘Fake News’. E belasting aki ta algo cu ta conoci na Hulanda, pero no ta algo di Aruba y tampoco ta e intencion di trece esaki na poblacion di Aruba.
El a sigura cu locual a pasa tabata cu personanan a tuma un sheet di informacion cu tabatin e dia di stakeholders meeting tocante e reforma fiscal. Ruiz-Maduro a señala cu na e sheet un caminda tabata skirbi ‘Inkomen uit vermogen’, loke ta trata entrada for di locual e persona tin na propiedad of bienes y ora e ta bende esey ta haya cierto fondonan. “Esaki ta completamente otro cos cu ora bo tin un Vermogensbelasting, pero Aruba no tin esey”, Ruiz-Maduro a specifica.
Ruiz-Maduro a comenta cu e ta lamenta e mal informacion, forma for di un skina di media, ariba un situacion di loke ta trata reforma fiscal y cu lo por crea insiguridad den comunidad.
