Den e tempo dificil aki Empleadonan di Tierra del Sol a conoce aumento di 8% den CAO firma

Dialuna, sindicato STA y gerencia di Tierra del Sol a firma un contracto colectivo (CAO) pa 3 aña den presencia di e delegadonan y un grupo di trahadonan.

E firmamento aki ta e culminacion di varios luna di negociacion entre ambos partido, caminda dirigente di STA, Diego de Cuba a laga sa cu e trahadonan a bay dilanti cu aumento di salario y otro beneficionan. E CAO aki ta drenta na vigor cu forsa retroactivo for di 1 di januari 2019 y lo termina 31 di december 2021. E ta sigur cu despues cu e CAO aki a keda firma, paz laboral por reina pa e añanan siguiente den e compania di Tierra del Sol.

Aumento salario y beneficionan.
E empleadonan di Tierra del Sol cu ta cay bou e CAO aki lo conoce un aumento general di 8% reparti den 3 aña. El a splica cu den e prome aña, e trahadonan lo conoce 3% di aumento. E di dos aña nan lo conoce 2.5% y e di 3 aña 2.5% di aumento. Igualmente, e trahadonan ta gosa di un plan di spaar pa vakantie cu tambe ta forma parti di e CAO. Adicional nan tin un bono di fin di aña.

Sindicalista De Cuba a laga sa cu a pesar di e tempo dificil cu nos pais ta confrontando, toch sindicato STA, conhuntamente cu gerencia di Tierra del Sol, a logra yega na un CAO bon balansa pa e trahadonan di e compania aki.

“E contracto colectivo a conoce un adelanto bastante bon”, el a bisa. Un adelanto tin di haber cu e dianan adicional liber cu e empleadonan a haya. E ta un cantidad di 10 dia liber extra pa aña.

Aparte di esaki, a bin cu esunnan cu no ta meld ziek pa trabou lo haya dos dia extra den e aña regular, si nan no meld ziek for di januari te cu juni. Y pa e otro mita di aña nan lo reconoce esey tambe. De Cuba ta considera e beneficionan secundario aki bastante bon, ya cu STA ta calcula un adelanto di 9% si nan ta wordo midi den placa.

Tambe e trahadonan a conoce otro beneficionan pa loke ta seguro di accidente of fayecimento pa motibo di trabou cu e empleadonan ta eherce. E sindicalista a bisa na Bon Dia Aruba cu e trahadonan ta wordo protegi cu un seguro di bida tambe. Ademas nan tin beneficionan adicional pa cuido dental y bista. Pa loke ta e pensioen -segun presidente di STA- logicamente e componente aki ta forma parti tambe di e CAO cu a keda firma.

“Si nos mira bek ariba e contracto colectivo den su totalidad, ta un tremendo CAO”, el a bisa. Un adelanto substancial pa e trahadonan di Tierra del Sol -segun sindicalista De Cuba- cu a keda sumamente contento cu e CAO aki.

Presidente di STA a felicita primeramente e empleadonan di Tierra del Sol. Tambe el a gradici e delegadonan y gerencia di e compania aki pa e pasenshi brinda durante e tempo cu nan a negosha.