Net despues cu Cortenan di Husticia di Aruba, Boneiro, Corsou, Sint Maarten, Saba y Sint Eustatius (Gemeenschappelijk Hof van Justitie, Hof) a hisa bandera na halfstok pa mustra solidaridad cu e abogado asesina na Hulanda, a instala 7 hues nobo na Hof. Ta bay traha un plan di integridad, segun presidente di Hof.
Presidente di Corte Comun di Husticia, Eunice Saleh, a duna di conoce cu corte ta trahando riba un plan di integridad, bisando cu prome cu establece esaki, lo institui un codigo di conducta. Segun e presidente, integridad ta un cualidad importante pa Hof, pues a cuminsa traha riba un trayecto di integridad. “Nos tin plania pa haci training di ‘conscientisacion riba integridad’ pa tanto huesnan como trahadonan di corte. E prome meta ta pa bin cu un codigo di conducta. Na mesun momento lo traha riba maneho di integridad y instrumentonan di maneho cu lo por realisa e metanan di integridad”, Saleh a bisa.
E rason dicon corte ta cuminsa traha riba e aspectonan di integridad ta pa via di loke a pasa un par di dia pasa cu e asesinato di e abogado Hulandes Derk Wiersum, cual ta mira como un atake riba e estado di derecho y democracia. Den e cuadro aki e presidente a para keto riba corte su rol riba garantisa y proteha democracia. Saleh a sigui bisa cu “Hof mester sigui pensa con e por aporta na un sociedad mas husto, specialmente como tercer poder di estado. […] Den su posicion den sociedad como poder independiente, e por parce cu Hof ta sinta riba toren halto ta dicidi riba conflictonan den sociedad como instituto distancia. E imagen ey nos mester purba cambia, pasobra Hof ta purba para memey di sociedad. Hof ta mira cu ta su responsabilidad, hunto cu otro partnernan den sociedad, pa percura cu e estado di derecho keda den su luga”.
Saleh a splica cu Hof ta haci esaki por medio di pidi critica constructivo riba su funcionamento di banda di Ordo di Abogadonan, e deurwaardernan, Ministerio Publico, Voogdijraad y notarionan. Ademas ta existi un manera pa entrega keho, Hof ta duna entrevistanan y ta haci investigacionnan riba satisfaccion di cliente.
Saleh ta sigui bisa cu “E posicion independiente di Hof ta trece cu ne cu Hof mester preveni di bay den discusion, entre otro ora ta trata di un caso di corte. E critica ta bin ora ta bisa cu e poder hudicial ta sonde tras di esaki. Pero esaki no t’asina. Critica claramente tin efecto riba e contenido di e caso. Den nos sistema di derecho t’asina cu un hues ta papia por medio di su veredicto. Un hues no ta bay den discusion riba su veredicto. Esey sigur ta e situacion ora ainda tin chens pa bay den apelacion of hoger beroep of mas halto. Cu Hof ta haya cu laga opinionnan sali bay afo no ta algo bon pa haci no kiermen cu nos no ta interesa den critica. Critica semper ta evalua internamente y ta purba mehora e profesionalismo. Ora ta necesario tambe ta duna splicacionnan riba esaki”.
