Detenidonan di blok 4 ta sumamente rabia cu e manera con e vigilantenan a bin ta trata nan. Nan tin miedo pa nan bida den anochi, ora ‘cualke drone’ por bula riba e prizon unda nan ta encarcela, resultando despues den un bashamento di bala na e prizon.
Segun Vigilante Korsou, tabatin otro bashamento di bala riba e prizon, den area di blok 4, despues cu a tuma nota di un drone bulando den cercania di e blok. Segun e detenidonan e vigilantenan, cu un polis di fam Cijntje na cabes, tabata tirando riba blok 4 cu shotgun y tambe glock. Ta conoci cu tiramento den area aki ta restringi, pero segun Vigilante ta haci esaki maske ta conoci cu esaki lo por trece consecuencia cune. Despues di esaki, segun e detenidonan, esunnan cu a tira a bay sconde tras di muraya, den oranan di anochi.
E detenidonan a haya hagel den nan cel y tambe bala bashi, cual nan a entrega na Mando Policial. E detenidonan a haya contesta cu e mando no a tuma nota di ningun tiramento, ya cu ainda no a traha un rapport den e caso aki. E detenidonan a keda insisti cu ta sigui basha bala continuamente, cual no mag. Aparentemente e dronenan aki ta circula riba prizon pa laga articulonan atras pa e prizoneronan. Siman pasa tabatin un prizonero cu a subi riba dak pa bay recoge dicho articulonan, cual a conduci na e castigo di e detenido pa a sali di su cel y subi riba e instituto di coreccion. Den luna venidero minister di husticia tin plania pa instala un sistema di radar riba e prizon pa evita cu e drone por sigui bula riba e instituto.
