Den entrevista cu Minister encarga cu Enseñansa Michelle Hooyboer – Winklaar, el a trece informacion dilanti di resultado di un investigacion haci riba e situacion di keda sinta na scolnan basico. E estudio a revela cu ora un mucha keda sinta e no ta yuda e mucha a largo plaso. Aña escolar anterior 3 scol basico publico a participa den un proyecto piloto pa mira e efectonan, consecuentemente a tuma decision cu scolnan basico cu ta cay bou di gobierno lo no conoce keda sinta mas.
“Na final di aña escolar 2015/2016 rond di e luna di mei mas o menos, nos a sinta cu Dienst Publieke Scholen (DPS), hunto cu tur e diferente scolnan basico cu ta relata na DPS. Pa por a wak kico por a wordo haci pa nos por elimina of minimalisa e cantidad di studiantenan cu ta keda sinta tur aña den eerste klas. E ta un problema general pues no solamente di eerste klas. Tin un cantidad di muchanan cu ta keda sinta compara cu otro paisnan den region y paisnan den mundo, un porciento hopi grandi di entre 16 te 20% di muchanan cu ta keda sinta den eerste klas so. Y si conta den henter e liña di scol basico, tin un averahe di mas o menos 8 cu 10 porciento. Y esey compara cu otro paisnan cu ta entre 1 cu 2 porciento (paisnan mas desaroya na mundo). Cu e porcentahenan aki, nos ta resalta masha hopi mes den e aspecto negativo. Nos a sinta y delibera over di kico por ta e motibo tras di dje y a wak rapportnan cu a wordo haci rond di mundo via UNESCO y Nacionnan Uni. A wak diferente organisacionnan cu ta specialisa den e parti di enseñansa cu a studia esaki cu tin porcentahe halto di muchanan cu ta keda sinta. Conclusion ta, cu e ta simplemente un escogencia cu un pais ta haci si ta wanta un mucha atras, si of no.”
Sra. Hooyboer-Winklaar a splica cu e hecho cu un mucha ta keda sinta no ta papia di e capacidad di e mucha, e no ta papia di e capacidad di e maestronan pasobra e ta varia. Den un klas semper tin muchanan cu ta super ‘sabi’ y muchanan cu riba papel ta presta menos, pero cual no kiermen cu nan no ta capacita. Tin hopi diferente factor cu ta hunga un rol si un mucha ta capta un stof of no. Locual cu a wak den tur e estudionan ta cu na final di dia, e ta un escogencia den e sistema cu ta bisa cu nos no ta satisfecho cu con e mucha a desaroya durante e aña escolar, y cu ta bay want’e y lag’e ripiti e aña full di nobo. Estudionan cu a wordo haci tambe definitivamente a bisa cu esaki absolutamente no ta yuda e mucha aki a largo plaso. Es mas, e ta haci contrario, pasobra den e aña cu e mester haci di nobo e ta mehora un tiki como cu ta ripiti e stof, e ta bolbe haci mesun cos. Kiermen temporalmente tin un pik, anto despues di esey e mucha ta bolbe cay, anto e sla cu e ta haya psicologicamente door cu el a keda atras y su amistadnan si a sigui, ta sumamente grandi.
Tin testnan haci riba muchanan cu ta mustra cu muchanan cu ta keda sinta sikiera un biaha, tin un efecto riba full nan carera di enseñansa. Esey ta tur e factornan cu a pone nos realisa cu nos tin un problema y ta wak esey. Tin diferencia di opinion riba e pakico y hopi biaha ta haya como contesta e idioma. Pero hasta na scolnan multilingual, e muchanan ta haya instruccion di les na papiamento ta wak cu ainda e porcentahe ta mesun cos. Pues esey no ta un factor cu ta splica ful kico e fenomeno aki ta. Y mas bien ta keda un escogencia y cultura. Rond mundo na paisnan cu tin cifranan halto, nan ta yama e cultura di keda sinta. Pasobra e maestronan ta bisa pica, nan no kier pone mas presion riba e mucha y nan ta lag’e keda sinta pa alivia e mucha, sinembargo awo tin cifra cu ta mustra cu esaki no ta funciona asina.
Programa piloto
DPS ta cay directamente bou di gobierno y ta eynan pues ta unda cu lo a cuminsa y a papia cu tur docente y cabesantenan y e conclusion tabata cu na final di dia nan ta reconoce cu berdad mester traha y mehora esaki. A keda e ora di bay implementa esaki pa aña escolar venidero, 2016-2017, sinembargo algun scol a bisa desde aña pasa cu nan kier traha riba dje di biaha y nan a sinta cu DPS y nan a traha un plan. Ta trata scolnan Colegio Conrado Coronel, Colegio Hilario Angela y Prinses Amalia Basis School, kendenan a implementa e programa piloto. Resultado cu a drenta awo ta mustra nos cu for di e total di 130 mucha cual ta tur e muchanan den eerste klasnan na e scolnan aki, si no tabata pa e piloto 11 lo a keda sinta. Esaki ta mas o menos 8 porciento. Locual cu ta wak awo ta cu door di e piloto aki 1 ta keda sinta, en bes di 11. Den e caso aki, e mucha aki ta bay e centro di observacion, pues no ta ni keda sinta specificamente, pero ta “stroom door” na otro enseñansa.
Segun Sra. Hooyboer Winklaar esaki ta rekeri palabracionnan hopi estrecho entre mayornan, entre scol, cabesante, maestro. Tur e diferente actornan mester forma un team rond di e mucha cu ta den liña cora como chens pa keda sinta.
Conclusion DPS
E conclusion cu DPS a entrega por medio di un verslag cerca nos ta bisa cu nan ta wak e como un exito cu a logra di pone esaki na e tres scolnan aki y ta cla pa implementa esaki e ora na tur scolnan basico di DPS e aña escolar aki. Esaki kiermen cu e aña escolar 2016/2017. E extra klas den kleuter tambe lo ta aplicabel pa e aña escolar venidero tambe.
Segun minister ta splica e no ta bay crea un situacion fastioso pa un mucha cu cambia di un schoolbestuur, den principio e lo beneficia di esaki. E hecho ta cu lo kier keda cla cu tur e scolnan publico, como cu ta eynan nos tin influencia y por tuma e decision pa presenta esaki na otro directivanan di scol y mustra nan cu a draai e programa piloto y ta invita nan pa cambia e maneho tambe. Pero esaki ta bin cu su costo pasobra mester sigura cu e klasnan no ta mucho grandi, entre otro aunke cu scolnan di SKOA tin menos alumno cu DPS, pero tur ta hunga un factor. E meta a largo plaso ta cu tur scol lo tin e mesun acercamento. Kisas no por elimin’e completamente, pero sigur lo bah’e significante, e mandatario a termina bisando.
