Prome Minister Evelyn Wever-Croes: Gobierno ta estudiando diferente posibilidad pa cera e gap financiero

Ultimamente, ta hopi discusionnan ta core rond tocante e tema di Sugar Tax. A nota te hasta cu cierto compania a kita trahadonan for di trabou y menasa otronan di lo wordo kita, uzando e excuus cu ta pa motibo di Sugar Tax. Cierto medionan di comunicacion tambe ta treciendo rabia y panico den pueblo riba e tema aki. Prome Minister Evelyn Wever-Croes a enfatisa cu no tin niun decision riba Sugar Tax.

“Tin un gap financiero hopi grandi cu mester wordo cera. Gobierno di Aruba no tin un decision pa cera e gap aki cu Sugar Tax. Nos ta trahando pa cera e gap aki, pero no tin un decision riba Sugar Tax”, Wever-Croes a enfatisa den un comunicado di prensa.

Ta di lamenta cu un compania priva a cuminsa retira su trahadonan caba pa motibo di e discusionnan di Sugar Tax. Esaki, segun Wever-Croes ta un manera pa hunga cu sentimentonan di hende na un manera hopi abusivo y doloroso, pasobra no tin un decision riba Sugar Tax. Gobierno di Aruba ta den deliberacion cu e companianan pa scucha nan input. Siman pasa tabatin encuentronan entre Gobierno y stakeholders. Gobierno ta evaluando tur input ricibi. Despues lo bolbe sinta na mesa cu tur stakeholders pa discuti riba e diferente sugerencianan.

Wever-Croes a indica cu tin combersacionnan riba diferente posibilidad cu ta studia pa cera e gapb financiero. Ta tuma tempo pa esaki, pa cual motibo e mandatario ta pidi pueblo pa duna Gobierno e tempo y trankilidad pa Goberna y tuma e miho decisionnan.

“Bou presion ta facil pa tuma decision, sea ta malo of bon pa comunidad. Pero nos ta purba di keda trankil y pasa ariba tur preocupacion cu tin. Cual preocupacionnan ta comprendibel. Nos tur ta bibando cu e preocupacionnan aki. Pero Gobierno di Aruba ta buscando e miho solucion cu pueblo di Aruba por biba cu n’e. No tin decision ni riba Sugar Tax, ni riba nada otro pa cera e gap financiero, cu a wordo causa door di e gobierno anterior. Mi ta lamenta e campañanan cu ta treciendo informacionnan falso pa destabilisa e desaroyonan positivo di nos pais. Duna mi espacio pa traha riba e solucionnan y mi lo presenta e pakete cu talbes nos por biba cu n’e”, ta e palabranan di Wever-Croes cu cual e comunicado ta finalisa.