Ayera tardi Presidente di Parlamento, Ady Thijsen, mester scucha no e debate treci den sala di nos organo legislativo, sino e bos directo di e trahadonan di e companianan cu ta cay bou e mesun dak di Meta Corp, expresando nan mal contento cu dos ley cu ta na caminda, esta ley di Serlimar y Sugar Tax.

Pero tambe ayera a wordo manifesta e bos di un grupo cada bes mas grandi di e docentenan cu ta sigui expresa nan malcontento contra e maneho di Minister Rudy Lampe riba tereno di enseñansa. Den ambos manifestacion un manifiesto a wordo entrega na Presidente di Parlamento den presencia di algun Parlamentarionan.

Presidente di Parlamento, Thijsen kende prome cu a bira politico e tabata abogado cu a yega representa sindicato den Corte, a expresa su comprension pa e trahadonan di Meta Corp y tambe esunnan di enseñansa. El a bisa cu ambos grupo tin e legitimo derecho di manifesta libremente nan mal contento den cuadro di estado di derecho cu nos ta biba na Aruba.

“Grito semper tin den comunidad. Esey ta e libertad cu nos tin pa expresa nos mes,” el a bisa. E ta consciente cu como un organo cu ta expresion di un democracia, Parlamento tin cu scucha pueblo pasobra ‘pueblo a pone nos akinan y ta pueblo ta kita nos bek.’

Nan ta dispuesto di scucha e gritonan aki pa despues tuma decisionnan responsabel. Y ora cu nan ta tuma nan decision tambe e hendenan mester scucha nan riba e decision cu nan ta tuma como organo legislativo, el a expresa. E ta reconoce cu nos pais ta pasando den hopi problema, ya cu cada biaha nan ta hayando gruponan cu ta bin cerca nan pa trece nan preocupacion.

“Nos no ta den e miho momento di e pais aki y nos tin cu asumi responsabilidad,” segun Thijsen. El a bisa flat cu no mester priminti cosnan cu no por cumpli. Mas bien nan mester bisa kico nan lo por haci y con nan ta hacie. Como Presidente di Parlamento, e ta haya cu nan mester tuma decisionnan y actua di un manera responsabel.

Como Presidente di Parlamento e ta tuma tur e olanan di manifestacion cu ta tumando luga como un expresion di pueblo. “Den pasado mi no a wak cu e cosnan aki a pasa,” el a bisa. Den su 15 aña di experiencia como Parlamentario, e ta para pa e libertad di pueblo pa expresa su mes. Ya cu e ta haya cu nan ta expresion cu pueblo tin preocupacion y intrankilidad. E ta haya cu e intrankilidad aki tin un causa, y nan obligacion y deber ta pa nan por kita e intrankilidad aki.

Den un termino cortico e mester a atende e presencia di varios grupo cu a bay manifesta dilanti Parlamento. Como Presidente di Parlamento, e ta kere cu e mandatarionan t’ey pa cumpli cu nan trabou, pero Parlamento tambe t’ey pa nan por coregi y controla gobierno. Pero igualmente pueblo tambe tin bos pa bisa: ‘Tende ami ta kere cu e cos aki no ta bayendo bon.” Tur esaki ta posibel, pero e mester tuma luga di un manera responsabel, el a laga sa.