E Tercer Sala Penal di Audiencia Nacional di Spaña lo analisa diahuebs proximo e peticion pa extradicion di e ex-general Chavista Hugo (‘El Pollo’) Carvajal, deteni na Madrid desde su aresto na april pasa, despues di e peticion di parti di Estadonan Uni pa delito relaciona cu narcotrafico.
Carvajal tabatin un carera militar di mas di 30 aña y tabata, entre otro, hefe di inteligencia militar Venezolano. Recientemente, na februari 2019, Carvajal a kibra laso cu e regimen di Maduro y a pasa pa reconoce Juan Guaido como presidente encarga di e pais.
Prome cu esey, Carvajal a bira figura internacional despues cu autoridadnan hudicial na Aruba a deten’e riba peticion di autoridadnan Mericano na 2014, sigui pa decision di hues local pa permiti su extradicion. E asunto a haya un vuelta espectacular na momento cu gobierno di Hulanda, cu tabatin un peticion di regimen Chavista pa Carvajal bira consul pa Venezuela na Aruba, a laga Carvajal den libertad, cu e condicion cu e ta keda ‘persona non grata’ pa semper.
Su lasonan cu narcotrafico y cu guerrilla Colombiano sin embargo a mantene Carvajal riba lista di persona busca pa Merca, y su salida di Venezuela y kiebra cu e regimen no a sirbi di proteccion pafo di su pais. Su intencion tabata pa reuni cu su famia cu anteriormente a establece na Spaña.
Dilanti hues na Spaña Carvajal a declara cu e tin informacion concreto di e lasonan di gobierno di Maduro cu e grupo terorista Libanes Hezbollah, y cu e organisacionnan guerrillero Colombiano FARC y ELN. Carvajal aparentemente ta trata di yega na un acuerdo cu autoridadnan Mericano, pa logra menos castigo a cambio di informacion valioso di e regimen Chavista. Esaki pa e tribunal lo no ta consideracion, y cu mester evalua su caso a base di e evidencia Mericano.
