Ayera Hues comisario a dicidi pa pone e cuatro mucha hombernan cu a keda deteni dia 4 di september ultimo den libertad. E mucha hombernan ta relaciona cu un incidente caminda un adicto ambulante a wordo maltrata.
Ta asina cu na prome instante fiscal di husticia a dicidi pa alarga detencion di e sospechosonan.
Hues comisario a considera cu tin suficiente sospecho contra e dos mucha hombernan cu lo a maltrata e homber, kende ta un adicto ambulante. Sinembargo, ta trata di sospechosonan hopi hoben cu ainda ta bayendo school, y cu ademas a coopera completamente cu interogacionnan na polis. Tumando na cuenta e derechonan di mucha y tambe e circunstancianan bao di cual e mucha hombernan aki lo mester a keda deteni, Hues Comisario a dicidi pa laga nan bay.
Pa loke ta e otro dos mucha hombernan cu ta wordo sospecha di filma e maltrato, Hues Comisario a haya cu tin insuficiente prueba pa complicidad den maltrato di e persona.
