Diahuebs pasa, miles di Peruano a marcha pa apoya e propuesta di Presidente Martín Vízcarra, resisti pa e Congreso, di baha un aña su mandato y di e legisladonan, y asina adelanta e eleccion pa aña 2020.
Cu gritonan, ‘Vizcarra, scucha, cera e Congreso’, ‘Urgente, cera e Congreso’, miles di persona a marcha na Lima y otro ciudad pa presiona parlamento, domina pa oposicion, cu ta resisti di adelanta e eleccion.
“Nos ta pidi un salida democratico: Debolbe e poder na e pueblo”, e ex-candidato presidencial di iskierda, Verónika Mendoza a bisa den e marcha na e capital, den e cual a participa casi 3.000 persona, segun un calculo di e medionan. Tambe na otro ciudadnan tabatin marcha parecido.
E mobilisacion a ser convoca pa Coordinacion Nacional di Derechonan Humano, sindicato, y otro organisacionnan, pero algun persona a lamenta cu esey a coincidi cu un partido amistoso di e seleccion di futbol di Peru cu Ecuador na Merca.
“E obhetivo di e marcha ta cu tur mester bay di e Congreso. Mester cera esaki y tene eleccionnan nobo”, Mirian Chumacero, un muhe di 50 aña a bisa.
Diaranson pasa, e marcha a ricibi apoyo di Vizcarra, kende a hustifica e indignacion di e ciudadanonan riba e ‘intimidacion’ di e Congreso, cu ta refleha na varios apelacion pa ministernan y e periodico formacion di varios comision di investigacion.
“E actitud di intimidacion aki den tur e actonan di e Congreso lo pretende di daña e Ehecutivo, e Gobierno, pero nan no ta logra, nan ta daña Peru, p’esey e poblacion ta reacciona”, Vizcarra a bisa pa e prensa.
