Minister di Salud di Bahamas, Duane Sands, diaranson pasa a anuncia cu e cantidad di fayecido pa via di horcan Dorian riba e archipielgo a yega te na 30. 17 di e victima a perde nan bida na islanan Ábaco y tres na Gran Bahama.
E funcionario a destaca cu e cifra lo por aumenta den oranan proximo, pa motibo cu ainda tin area cu no a explora y cu a ser destrui pa e fenomeno, cu tabatin biento di mas di 200 kilometer pa ora e dia cu el a golpia e islanan.
Di su parti, e Hefe Humanitario di Nacionnan Uni, Mark Lowcock, a confirma e impacto ‘masha grandi’ cu Dorian tabatin riba Bahamas y el a agrega cu na e pais aki ‘nunca a mira algo di e escala ey’.
Lowcock, kende ta actualmente na Nassau, a señala cu mas di 70.000 habitante di e archipielago mester di ayudo inmediato. E zona mas afecta pa e horcan ta e islanan Abaco y Gran Bahama cu, di acuerdo cu e funcionario, a sufri un ‘devastacion enorme’.
Segun e representantenan di ONU cu ta na e archipielago, loke ta haci mas falta na e islanan ta awa potabel, cuminda, medicina y refugio pa e poblacion afecta.
Lowcock a pidi fondonan di comunidad internacional pa enfrenta e emergencia, na mesun tempo el a indica cu su oficina lo duna un miyon dollar pa satisface e necesidadnan mas urgente di e damnificadonan.
