Un homber di Amsterdam a ser likida na Corsou dialuna. Polis a identifica e victima como e criminal di Amsterdam Genciel ‘Genna’ Feller. E homber di 23 aña di edad a sconde na Corsou despues di un otro atento contra su bida na Almere luna pasa.
Feller tabata sinta den un Hyundai blanco staciona na Willemstad ora cu dos persona los tiro contra di dje, segun e imagennan di e camara di vigilancia comparti pa medionan local. E tiroteo a sosode alrededor di 10 or di mainta dilanti un supermercado y un restaurant.
Segun informe di Polis Hulandes, Feller a resulta herida den un tiroteo na un cas situa na Dokkumlaan na Almere durante e prome oranan dia 4 di augustus ultimo. E tiroteo a sosode na e cas di su pareha. E alcalde di Almere a emiti un ordo di restriccion contra Feller. Prohibiendo su persona pa bay cas di su pareha, y e homber a sconde riba isla.
Riba dia 8 di mei, Feller tabata un di e multiple sospechosonan aresta den e asesinato di Orpheo Gefferie di 24 aña di edad di Almere. E homber a ser asesina pa tironan na e parkeerplaats di The Bank na Amstelsraat na Amsterdam. Feller a ser laga den libertad un poco tempo despues, despues cu e investigacion a mustra cu e no a tira Gefferie. Polis ta kere cu e amigo di Feller, Erxinio Luntungan tabata e persona cu a tira. Ainda e ta den libertad y Polis a pone riba lista internacional di buskeda.
Segun varios fuente, tin rumornan den mundo criminal di Amsterdam cu ta bisa cu Feller y otronan di Amsterdam Zuidoost a horta cientos di kilogram di cocaina di un criminal pa kende nan mester a warda e droga. Diripiente Feller tabata tin hopi placa pa gasta, esaki ta segun e rumornan. Su abogado, Bart Hartman, a bisa cu e tabata sorprendi pa e asesinato di su cliente. “Si un persona a ricibi dos tiro y ta muri na e di dos atake, un imagen natural lo surgi”,el a bisa. “Mi sa cu circuito criminal a hay’e, pero tambe e tabata un mucha cu hopi sentimentonan. Mi a gusta su persona y su morto ta afecta mi. Si el a crece den un otro bisindario, e lo no a tuma e decisionnan robes”.
\
