Controlando construccion ilegal

Dialuna mainta departamento DIP hunto cu DOW a informa tocante control andando actualmente pa loke ta trata procedura cu lo uza ora ta trata cumplimento y violacion di regla y construccion ilegal cu ta tumando luga.

Errol Sjak-Shie, Director interino di DIP a comparti tocante e maneho di ROP cu tin na vigor for di juli 2019, a base di maneho di ministerio di gobierno. E vision di maneho ta pa yega na un desaroyo sostenibel y duradero pa Aruba.

Sinembargo, ‘e otro banda di medaya’ pa implementacion di maneho ta cu mester tin control y mira si tur hende ta cumpli cu e reglamento y ley na vigor. Si un persona envolvi no ta cumpli cu regla of ley, no por yega na e vision.

Bou di departamento tin un afdeling cu ta haciendo e trabou di controla si e maneho cu ta regla ta cumpliendo cune. “E departamento di Toezicht, Controle en Handhaving. A base di e control nos ta yega na accion na dado momento cu hende no ta cumpli cu regla.”

Pa e motibo aki, ambos departamento a tuma accion na Pos Chikito, pa construccion ilegal cu ta tumando luga riba tereno di gobierno. Y mas si ta un tereno cu tin aspecto di conservacion y proteccion di medio ambiente y naturalesa. Pa controla construccion ilegal ta bira mas importante.

E aspecto pa loke ta informacion kico hende mag of no mag di haci, esaki ta informacion di e maneho den ROP. A tene reunion di informacion riba dje y ta publica na e pagina di DIP cu DOW. Tur hende por tuma nota pa locual ta teritorio di Aruba y con pa yega na e desaroyo duradero, cual ta e meta, y ademas siña tocante ley y reglanan den e maneho.

Otro aspecto di informacion, ta trata hende cu tin tereno di gobierno ta pasa esaki sea pa medio di contract di huur, agricultura, cria di bestianan, e contracto cu tin para. Sea pa esunnan cu ta haya un erfpacht pa construccion di cas, negoshi of proyecto cu a pasa nan acto na notario hunto cu contract firma pa gobierno. Ta stipula kico ta e regla ta pa e persona cu ta envolvi cu tin su tereno regla.

Banda di esey tin tereno cu no ta wordo otorga. E tereno tin un funcion publico den cuadro di maneho stipula den ROP.

E zona di costa nort, Parke Nacional Arikok, zona di mangrove y zona cu ta proteha caminda naturalesa ta conserva y mas informacion a duna den pasado. Area cu tin cu respeta sin haci construccion of traspasa sin permiso. “Esey ta informacion cu mayoria di hende mester sa, cu no por haci construccion ilegal”, Sjak-Shie a expresa.

DOW tin ley di construccion, anto tur hende mester ta na altura cu permiso di DOW pa construi ‘sin permiso, no por’. Hende cu ta haciendo ilegal consciente of inconsciente, pasobra nan sa cu mester permiso di construccion, nan mester sa si e tereno tin otro destinacion, di otro hende ‘no por djis bay ariba y cuminsa construi’. Ni si e tereno ta pega cu otro.

E ley di ROP ta prome cu 2009, unda cu maneho stipula den conservacion area natural den costa nort, Spaans Lagoen, Pos Chikito den area cu ta protegi cu mester pone atencion riba dje.

Sinembargo Sjak-Shie a bisa cu tin mas construccion ilegal ta tumando luga. Construccion cu ta viola regla den tur ramo. E maneho ROP ta stipula kico ta e destinacion di tereno of area cu den tur aspecto mester cumpli den parti di control. “Nos ta pone enfasis den parti control completo, pa hende cumpli cu regla di maneho, pa yega na desaroyo duradero pa isla.”

Marlon Croes, director di DOW a bisa cu e maneho y vision di ministerio pa uzo di teritorio, DOW y DIP ta colaborando hunto pa ataca e problema di construccion ilegal. Tambe e problema di construccion riba un tereno cu tabata destina pa otro uzo.

Tambe ta controla. Un ehempel cu Croes a menciona ta si ta un construccion di cas, y persona dun’e uzo comercial sin permiso necesario, esta tereno di gobierno ta wordo uza ilegalmente.

Actualmente ambos departamento trahando riba e pier di Pos Chikito ta investigando pa otro construccion ilegal. Croes a bisa cu control lo sigui pa e proximo siman. “Nos lo avisa e doño di tereno. DOW lo duna sosten na DIP pa control cu mester haci.”

Pa hende cu no cumpli regla, lo bay conoce accion segun e maneho di forsa di DIP hunto cu DOW pa loke ta e ley y lo ta mas estricto. “Na e pier di Pos Chikito, mangrove a wordo corta y uza tereno di gobierno. Awa cu ta destina pa e parke marino. Tur construccion ta contra e reglanan aki.”