Enfoke pa sigui brinda sosten na persona cu limitacion visual

Fundacion FAVI a cuminsa cu nan accion di donacion 2019 cu lo dura te cu december. Un evento cu ta haci tur aña pa recolecta pa sigui yuda esnan cu ta visualmente incapacita.

Andre Kelly, Presidente di Directiva di FAVI ta informa cu un actividad asina ta necesario pa e fundacion sigui opera. Pa motibo cu gran parti di donacion ta bin di comunidad pa duna nan cliente e miho servicio.

E accion di donacion ta caminda FAVI, conhuntamente cu boluntario, ta ‘subi caya’ pa acerca comunidad, hende conoci, compania priva y tur esnan cu por pa pidi sosten financiero pa yega nan meta.

Actualmente na FAVI tin 360 cliente registra cu ta ricibi servicio di e fundacion. “Statisticamente na e ultimo Censo na 2010 tin un promedio di 3100 hende cu problema di bista. E relatividad ta keda cerca si nos compara cu Hulanda of otro pais”, Kelly a expresa.

E ta bisa cu e cantidad di persona cu limitacion di bista, of cu ta totalmente ciego nan ta yuda. Sinembargo e ta agrega cu semper tin esnan cu no ta acerca of tin dificultad pa acepta nan limitacion cu prome cu nan pidi ayudo.

Cu e fondo cu logra ta bay pa mehora nan servicio, cumpra aparato auxiliar pa nan cliente. Tambe cu fondo nan lo crea mas campaña di conscientisacion y mustra kico nan tin pa ofrece nan cliente cu ‘algun porta tin duda si nan mester di nos asistencia’.

Nan enfoke principal ta pa trece alegria na nan cliente. Pa saca cliente cu limitacion di bista di nan isolacion y no keda scondi den comunidad pasobra nan no ta sinti cu ta forma parti. “Nos enfoke pa trece alegria, nan sali afo. Pa nan por acerca na otro clinete pa pasa bon y keda stimula. Pa esnan cu kier siña, den e arti di enseñanza ta duna les di Braille, cushina y mas.

Sinembargo tin mas cu 40 mucha cu tin limitacion visual pero FAVI ta asisti e mucha na scol. Nan tin dos estudiante cu a caba scol basico cu actualmente a drenta scol secundario cu asistencia di nan asistent di klas. E mucha por sigui su estudio y integra manera cualkier otro estudiante sin sinti diferente.

Kelly ta informa cu ultimamente mas mucha ta bin afo. Sinembargo, e tabu t’ey ainda. Ta cu e dokter di cas ta dirigi e mucha pa FAVI cu mester aistencia y tambe cu yudansa di nan dos maestro ambulante cu ta integra e mucha den scol.

Caso den area laboral unda cu persona cu tin algun faya cu su bista anto ta ripara. FAVI ta bisa cu tin bon comunicacion cu dunado di trabou pa asina ofrece informacion pa e cliente por yega cerca nan ‘pa asina e pashent acepta cu e tin limitacion’.

Asina mes, Kelly ta bisa cu nan no ta solamente yuda esnan cu ta ciego, pero tambe cualkier limitacion cu nan bista. “Si bo bista ta menos cu 30% World Health Organization’ ta reconoce persona cu tin mal bista. Ora bo ta ciego e bista ta abou 10%.”

Charlene Marchena, guia di activdad na FAVI, a conta cu cada boluntario cu ‘pasa cas pa cas’ na cada persona cu ta registra na e lista pa recolecta. E aña aki FAVI ta cumpli 45 aña di existencia y lo duna un regalo na e donadornan. “Paña pa haci bril limpi cu slogan di ami ta apoya FAVI. Abo tambe?”

Tambe cada un cu haci donacion lo ricibi un recibo di FAVI como prueba di donacion anual. Tur aña e colectante ta duna comentario pa FAVI por recauda tur e placa cu nan mester. E meta cu nan kier yega ta mas di 80.000 florin pa e mantencion di e luga y activdad cu nan lo sigui brinda cliente.

Nan ta spera di haya mas persona pa colabora y pa esnna cu semper ta colabora pa nan sigui. “Pa logra nos meta y alcansa mas soño pa hende cu limitacion di bista ta desea pa bay dilanti den nos sociedad. Entre mas dunado, tin mas posibilidad pa duna e cliente na FAVI.”

Pa persona cu kier contribui pa prome biaha y no sa con pa acerca e fundacion por haci nan donacion via banco RBC 31366122 of Aruba Bank: 7024380290 tambe pa cualkier otro informacion por yama FAVI 585-5222 pa asina hayamas informacion. Pa finalisa a haci entrega di pakete di e colectante.