Despues di ayera cu tabata Conseho di Minister di Reino, Gobierno Hulandes a dicidi di pospone pa haci cambio na e LAft, lagando esaki te dia 20 di september. Asina un comunicado di gobierno y tambe un articulo den corant Amigoe a laga sa awe merdia.
Hulanda ainda ta den deliberacion cu Aruba pa asina bin na acuerdo riba e cambionan cu mester haci cu e ley di supervision financiero pa Aruba (LAft). Den un comunicado di gobierno e gabinete ta sigura cu prome cu e proximo reunion yega e minister plenipotenciario na Hulanda Guillfred Besaril (MEP) lo presenta un alternativa, na luga di yega na un aanwijzing (instruccion) unilateral pa forsa medidanan cu lo sigura cu Aruba por cumpli cu e normanan estableci den e protocol entre Aruba y Hulanda den november di 2018.
Gobierno di Aruba ta parce di a controla e situacion suficientemente despues cu parlamento a cambia e ley di supervision unilateralmente, cual no a cay den bon tera cu Hulanda. Na mesun momento gobierno di Corsou a haya un aanwijzing, pero premier Rhuggenaath a logra yega na palabracion cu Hulanda pa hunto yega na finanzas publico sano. Sinembargo, Corsou ta pendiente di conseho di Raad van State riba Corsou su intencion di bringa e instruccion huridicamente.
Gobierno ta sigura cu ‘supervision financiero ta parti di e maneho’. Den nan comunicado ta indica cu Gobierno ta trahando riba un alternativa den cual por tene cuenta cu e preocupacionnan di Parlamento y di Conseho di Minister di Reino, y pa esaki mester di tempo. Den e siguiente reunion di Conseho di Minister di Reino dia 20 di september e punto aki ta riba agenda atrobe, y pa e fecha aki Minister Plenipotenciario di Aruba na Hulanda lo presenta e alternativa cu Aruba ta propone.
