Diabierna na Scol di Polis e enfoke tabata riba esunnan cu a huramenta, pa asina inicia nan stage of ricibi nan diploma despues cu nan a gradua den nan respectivo curso di capacitacion personal. Minister di Husticia mr. Andin Bikker den su discurso a cuminsa na yama bon bini na e klas nobo di 2019 cu a inicia nan estudio policial dia 19 di augustus.

E comunicado cu nos a ricibi ta indica cu den cuadro di e programa di gobernacion di Gabinete Wever-Croes, a pone enfasis pa yega na mas visibilidad policial riba caya y den cuadro di esaki ta haciendo tur esfuerso den e reto financiero di pais Aruba pa yega na mas Polis pa inicia nan estudio na e instituto. Hobennan cu ta inicia nan carera den Cuerpo Policial, mester sinti nan mes orguyoso di ta forma parti di e klas nobo pasobra nan esfuerso y perseverancia ta primordialmente e motibo cu ta forma parti di e klas aki. Hopi solicitud a drenta, pero na final despues di un seleccion estricto e klas a resulta di ta cumpli cu e exigencia y rekisito pa inicia cu e estudio policial.

Minister Bikker a felicita nan y desea cada un di nan exito den nan estudio. Na tur funcionario policial cu a yega na un milestone den nan carera profesional igualmente un pabien pa e logro excepcional. Durante ceremonia special di diabierna mainta Minister Bikker a entrega diploma y certificado na klas 2015 kende a completa e opleiding nivel MBO 4, klas 2017-1 y klas 2017-2 kendenan a ricibi nan certificado basico pa asina cuminsa nan Trainer Werken Leren Politie y tambe e diploma di Middenkaderopleiding di klas MKO 2018.

Tambe a huramenta klas 2018 pa inicia nan stage y Minister Bikker a bisa di ta admira nan esfuerso pa nan dedicacion y sacrificio pa logra un meta. Un palabra di aprecio y admiracion a bay pa nan famianan cu ta duna nan apoyo den e meta aki y sin lubida tur e docentenan cu a guia y asisti nan durante nan trayectorio. Cada stap den carera profesional di un Polis ta trece mas sacrificio reto y dedicacion cu ta exigi mas di e persona como tambe e bida familiar y social. Minister ta hopi orguyoso di por a constata graduacion di un grupo cu a termina e Tourism Oriented Policing cu ta e TOP opleiding.

Esey ta duna Minister Bikker hopi honor pasobra un par di siman pasa, a inaugura un di e oficinanan nobo den centro di ciudad cerca di e area crucero cu ta visibel pa tur turista. Tur dia Aruba ta biba di turismo y ta hopi importante pa no solamente duna e atencion merecidamente na e pueblo su siguridad pero tambe e bishitante. Finalmente Minister Bikker a gradici cuerpo policial y tur presente pa e esfuerso di por a logra na contene y minimalisa e High Impact Crimes cu aña 2018 por ehempel a baha e indice rond di 34 cu un tempo tabata 65. Esey ta un esfuerso hopi grandi di parti e polis cu tur dia ta den pueblo vigila y garantisa siguridad di e poblacion pero tambe di e bishitante. Minister Bikker a felicita tur y cu Dios bendiciona nan.