Lider di Fraccion di POR den Parlamento, Marisol Lopez-Tromp a expresa su opinion pa cu e caso di e contract di Richard Arends cu Refineria di Aruba (RDA). Esaki a sosode durante reunion publico di Parlamento unda a trata e procedura relaciona cu aprobacion di ‘geloofsbrieven’ di candidatonan pa bira parlamentario.
Lopez ta haya e contestanan manda door di Minister President pa parlamentario Vrolijk relaciona cu e caso, hopi grave pasobra algo cu ta resalta ta e sumanan cu supuestamente a wordo cobra siendo cu e persona aki tabata den e funcion di consehero di un of dos minister den e gabinete anterior y despues tambe como parlamentario, es decir, e tabatin e posicion di consehero pa bienestar di Pais Aruba no bienestar personal, mucho menos bienestar financiero personal, ta p’esey e tabatin un salario. “Bo ta suppose di guia e minister pa con pa hiba su cartera miho, con pa cuida e placa di e pagado di belasting y netamente bo persona den otro funcion practicamente ta haci un coup financiero riba algo cu bo mes ta suppose di cuida”.
2016 ta un aña unda tabatin discusionnan riba CAft y supervision financiero, Parlamento no tabata ricibi informacion financiero di Land Aruba, manera ta e caso na e momentonan aki.
Parlamento tabata bin hunto pa trata Presupuesto Supletorio, es decir, ora e placa a wordo gasta caba y tabata manera lomba contra muraya.
E tempo ey Aruba tabata haya hopi bishita di Plasterk, pero tambe di Sr. Richard van Zwol kende a indica caba cu e situacion tabata serio. E persona cu mas hopi tabata papia cune na nomber di Gobierno di con pa saca Aruba for di debe, baha gasto y pone Aruba bek den balance pa loke ta su presupuesto tabata Richard Arends como consehero financiero pa Gabinete Mike Eman. E ta e persona cu tabata duna conseho na e respectivo ministernan, e tabata e persona cu mas tabata sa y duna conseho financiero na diferente minister. P’esey Lopez-Tromp ta bisa cu Sr. Richard Arends no por bisa cu e tabata desconoce e situacion financiero di nos pais, e tabata bon na altura di cada cen riba presupuesto, con lo mester a wordo corta p.e. den parti social, den parti educacion, den nos fundacionnan, di infrastructura y salud, djis pa menciona algun. Ademas e tabata esun cu ta sinta den tur reunionnan pa atende cu CAft.
Ta importante pa menciona esaki pa atende cu e tema cu ta tratando den Parlamento, pasobra e ta e persona cu tabata traha e letternan chikito den contractnan y sa hopi bon kico 2.6 miyon kiermen, ademas di sa e envergadura di tur loke a wordo trata y firma.
Igualmente e tabata envolvi den tur negociacion cu Citgo y reapertura di e refineria, e ta e persona cu a bisa cuanto placa e refineria lo a trece aden. E tabata envolvi den e contract cu Citgo, e contract cu ningun hende, incluyendo Parlamento no por a haya.
Es decir, e tabata bon na altura di henter e situacion y p’esey Lopez-Tromp ta puntra su mes con por tabata posibel cu a sabiendo di e realidad financiero desastroso di Pais Aruba na 2016, cu e mes ta cera un contract asina, net ora cu AVP a priminti yen hende trabou via helpdesk pa Citgo y reapertura refineria cual hasta a hinca entradanan ficticio den presupuesto di pais Aruba y CAFT a guli e pildo ey tambe.
Den cuadro di e situacion aki, Lopez-Tromp tabatin algun pregunta pa Prome Minister. E ta desea di sa cual ta e miembronan di e diferente comisariadonan y e rolnan cu minister of parlamentarionan no por tin, manera por ehempel Richard Arends cu a wordo paga door di Refineria di Aruba (RDA) na varios ocasion y den diferente rol. Mirando esaki kier sa cua ta e autoridad y responsabilidad di e miembronan di e huntanan di comisario.
Kico Prome Minister ta pensa di Good Corporate Governance? Lo kier sa cuanto placa tur e aperturanan ficticio di e refineria a costa y con por ta cu esakinan a wordo aproba?
Ki consecuencia por tin cu tin un parlamentario cu a abstene su mes di duna informacion importante na Parlamento, Gobernador y Gobierno den su geloofsbrieven?
Finalisando Marisol Lopez-Tromp a indica cu e caso aki ta ilustra hopi bon pakico cada un ta drenta politica, kico ta e mindset y e meta ora ta subi un lista politico, ta gobernante of parlamentario. Esaki pasobra no por ta asina cu conscientemente tabata consehero di un gobierno y despues minister di un gobierno cu a pasa den un temporada duro cu Hulanda cu a impone un CAft, a pasa den e deal di refineria y algun a kere den dje pa loke ta cuponan di trabou den e refineria cu te dia di awe no a bin y tampoco a cera e buraco financiero y den e mesun temporada ey ta cera un deal lucrativo pa su mes, un contract cu no ta normal. Ta trata di un suma di 2.6 miyon cu ta net e suma cu actual Minister Otmar Oduber y Marisol Lopez-Tromp hunto a entrega tempo di ley di versobering pa lag’e den caha di pueblo, siendo cu ta trata di nan derecho di pension adkiri. Nan dos cu tin riba 20 aña trahando como politico y a bou op esaki a lag’e cay na beneficio di pueblo, mientras cu un otro cu apenas a drenta politica ta pensa con e por saca e 2.6 miyon for di saco di pueblo.
