A yega na redaccion e noticia cu director general di ministerio di Interior y Asunto di Reino, lo ta na Aruba otro siman. Richard van Zwol lo ta bin pa discuti e situacion actual cu gobierno di Aruba ta aden, loke ta cubri diferente tema interesante. Na prome luga ta trata di e situacion financiero cu Aruba su gobierno ta aden. Esaki riba su mes ta bay bira un tema bastante amplio, ya cu ta papia di dos presupuesto, unda no tin claridad riba ningun di dos. A keda pendiente e presupuesto 2016 cu lo mester tin adaptacion ariba, pa motibo cu aña ta avansando y no tin bista ainda kico ta e panorama pa resto di aña. Gobierno a haya te awor oportunidad pa fia placa den exterior pa cubri pago di debe riba bono cu ta madura e aña aki, pero no pa cubri deficit riba presupuesto. Esey lo por bin ora ta cla kico e deficit definitivo ta pa por manda un ley di adaptacion di presupuesto pa parlamento pa e presupuesto complementario (‘suppletoire begroting’).
Tambe ta pendiente presupuesto 2017, cu tambe ta depende di e negociacionnan cu Valero, pa por determina e resultadonan positivo cu e inicio di rehabilitacion por bay tin pa caha di gobierno. Algo cu ta birando urgente anto pa keda regla pa por termina e ultimo detayenan di presupuesto. Pero, manera nos a anuncia anteriormente, tin un retraso caba den e proceso, pasobra na moda di papia si Conseho Consultativo (Raad van Advies) mester haya e proyecto di ley di presupuesto awe pa mas tarda, tal bes por tin un conseho cla fin di e luna aki. Esaki simplemente pasobra ley di presupuesto ta un di e proyectonan grandi tur aña y ta tuma su tempo pa conseha ariba.
Naturalmente van Zwol lo bin papia riba e asunto di reapertura di e refineria como tema riba su mes tambe. No mucho tempo pasa gobierno di Reino a tuma e decision di manda un carta pa gobierno di Aruba pa urgi nan pa duna CAFT e documentonan corespondiente di e deal cu Citgo (y Valero), pa nan por haci nan trabao. Esey riba su mes caba ta un advertencia, despues cu CAFT mes a solicita e documentonan pero no a haya nada. Aparentemente ministro Blok cu ta reemplasa ministro Plasterk, cu tin problema di salud, no ta un ‘softie’ manera Plasterk y a cuminsa pone presion. Por mira bishita di van Zwol como otro señal cu gobierno Hulandes ta serio den e asunto aki y no ta nada trankil tocante e deal cu gobierno a cera cu CITGO/PDVSA. Logicamente gobierno di Aruba no ta contento cu Hulanda ta bin tira un bista den nan cushina pa bin wak kico tin riba candela, na luga di sinta trankil den restaurant warda ora cuminda ta cla. Pero desde cu ley di CAFT a keda introduci, mester simplemente cumpli cu e deseonan aki di CAFT y gobierno di Reino.
Mientras tanto, e problemanan ta keda acumula den scochi di gobierno. Tin pendiente ainda e asunto di all-inclusive cu ta significa duna apoyo completo na ministro encarga cu turismo, na un momento cu su posicion den partido ta obheto di discusion fuerte. Tambe tin e tema di e registracion di pareha di mesun sexo mediante cambio den nos Codigo Civil, unda pa prome biaha ta aparece un division serio den e fraccion berde cu por tin su repercusion den otro caso tambe.
Otro tema cu no a keda finalisa ta e nombramento di un gobernador nobo. No ta tende tanto comentario y esey ta bon pasobra varios actor den e asunto aki a bira demasiado entusiasma caba pa propone o promove tal o cual candidato, pa despues ripara e disgusto di parti di gobierno Hulandes, cu no gusta y no ta custumbra atende e asuntonan aki di manera publico, pero ta prefera haci esaki na un manera discreto. P’esey tambe cu no ta spera noticia riba e topico aki, pero no ta exclui cu si lo tin deliberacion.
Contal cu van Zwol, cu ta un veterano di mas di binti aña di atende asunto cu e islanan Hulandes den Caribe, ta yega Aruba den un ambiente cu no ta tanto cayente pa motibo di e ambiente entre Hulanda y Aruba, pero mas bien ta mustra bastante incertidumbre kico lo bay pasa den e tempo nos dilanti aki mes. Sin duda e lo desea di sa con ta bay para cu tur e temanan aki y esey pa un motibo principal. Manera cu cosnan ta bay awor, ta imposibel pa hiba un maneho financiero coherente, y tambe pa hiba un supervision coherente riba esaki. Y esey ta exactamente loke gobierno ta logrando, cu Hulanda no tin un bista cla riba nan maneho. Gobierno a sinta na mesa di roulette y a pone tur su fichanan riba un solo number y awor ta spera cu e hugada resulta bon. Si cos bay bon, tin mas empleo, mas entrada pa caha di gobierno y un caminda habri y exitoso pa eleccion na 2017. Y si no..
