Autoridad di aeropuerto di Munich a detene un pasahero, kende a sali for di un terminal na e porta di emergencia, na luga di pasa e control di paspoort. Esey a causa un clausura temporal di un di aeropuerto mas druk di Alemania.
Polis a bisa cu locual a pasa ta un fout y cu ta tiki probabel cu persona lo enfrenta cu consecuencia. E interupcion a afecta hasta 5.000 pasahero, ora cu Polis Federal tabata busca e pasahero no identifica, segun Robert Wilhelm a informa, kende ta Vocero di aeropuerto di Munich.
Terminal 1 y 2 a cera durante un operacion policial. Nan a habri un par di ora despues. A cancela alrededor di 190 vuelo di salida y yegada, segun agencia di noticia di Alemania a informa. Pasahero afecta, cu a pasa pa control di siguridad pa nan vuelo di salida, mester a pasa e proceso di nobo.
Aeropuerto di Munich ta un di e centronan di aviacion mas activo di Alemania y e ceramento a produci durante temporada halto di biahe den zomer. Polis a identifica e pasahero di Spaña, entre 20 pa 25 aña di edad, kende a bula for di Bangkok y lo tuma un vuelo di conexion pa Madrid.
Prome cu el a subi su avion, e pasahero mester a pasa pa control di siguridad, pero el a habri un porta di emergencia y alarma a activa.
Aña pasa a cancela 330 vuelo di Munich ora cu un hende muhe a drenta den area limpi di aeropuerto sin pasa pa control di siguridad.
