Representante di Oficina di Nacionnan Uni contra Droga y Delito (UNODC) na Bolivia, Thierry Rostan, a splica dia 22 di augustus pasa e reduccion di 6% den e presentacion di e informe di Monitoreo di Cultivonan di Coca di 2018 y den un acto na cual Presidente Evo Morales a asisti.
E gobernante, cu ta mantene como lider di e sector cocalero di e zona di Chapare (centro), a destaca cu e blachi di coca den su estado natural ta ‘alimento, pero tambe medicamento’, aunke despues a reconoce cu narcotrafico tin influencia riba su prijs.
“Mi ta lamenta hopi e mercado ilegal di cocaina, e mercado ey ta sigui regula e prijs di coca”, Morales a admiti dilanti di un grupo di diplomatico y dirigente campesino.
Segun UNODC, e cultivonan a keda reduci for di 24.500 te 23.100 hectar entre 2017 y 2018, nan a bolbe te e mesun nivel di aña 2016.
No obstante, e plantacion ta sigui riba e maximo cifra di 22.000 hectar fiha den e ley general di Coca na 2017, ora Morales a subi e limite legal ey for di 12.000 hectar cu tabata desde 1998, aunke esey no tabata respeta.
Coca ta e base di e produccion di cocaina, pero na Bolivia tin un uzo legal pa kauw e blachi of ‘aculli’, manera nan ta yam’e, den un infusion contra ‘mal di haltura’ y algun producto manera crema, hariña y energizante.
