Ayera dirigentenan di Sindicato di Duanero di Aruba, hunto cu un grupo di nan miembronan, a dicidi di bay Bestuurskantoor pa mustra nan malcontento cu un conseho cu Departamento di Recurso Humano (DRH) a duna riba structura salarial cu ta un lucha e duaneronan ta bin hibando pa varios aña caba.
A pesar cu na momento cu directiva y miembro a presenta na Bestuurskantoor, un reunion di Conseho di Minister tabata tuma luga, tanto Minister di Finansa, Xiomara Maduro como Minister di Husticia, Andin Bikker a baha pa atende e exigencianan di e duaneronan. Ta asina cu nan a dicidi di sostene un reunion mesora pa atende cu e conseho negativo cu DRH a duna riba structura estatal pa personal di cuerpo di Duana. Minister Maduro a expresa cu cada bes cu tin un accion di Duana, e ta trece consecuencia cune. “Boso por ta trankilo cu nos ta trahando riba dje,” el a expresa dilanti e grupo di duaneronan cu a dicidi bay den accion.
SADA y su miembronan tabata hopi satisfecho pa e atencion cu nan a haya. Nan ta sinti cu por fin nan a wordo scucha y nan ta pendiente di un proximo reunion dia 12 di september awor
Conseho di DRH
Na final di e reunion aki, durante un declaracion duna na Bon Dia Aruba, Presidente di SADA, Edward Maduro, a gradici ambos mandatario pa e atencion presta na e duaneronan, y el a cualifica cu e reunion a bay den un bon ambiente.
Tambe e sindicalista a bisa cu e reunion tabata uno productivo pasobra nan a haya un splicacion di loke ta trata e conseho negativo di DRH y tambe e conseho di Departamento di Wetgeving cu a drenta diahuebs atardi.
Unabes cu nan a scucha e splicacion di e mandatarionan, di nan banda directiva di SADA a contraresta algun di e puntonan cu a bin dilanti. Un punto clave cu SADA a contraresta tin di haci cu DRH a bin duna un conseho negativo riba e mesun trabou cu nan a yega di haci.
E sindicato di e cuerpo uniforma aki ta haya e conseho aki contradictorio y te hasta falta di profesionalismo. Con por ta cu un Departamento di Recurso Humano cu a conseha gobierno pa ofrece un cierto structura salarial, y despues ta bin un conseho negativo riba dje, segun Presidente di SADA.
E echo ta cu riba e structura salarial cu DRH a yega di ofrece, e miembronan di SADA a bay di acuerdo cune y nan a tum’e. A pesar cu SADA tabatin su proposicion, pero a pesar cu esun di DRH tabata representa menos pa e duaneronan, nan a dicidi di acept’e.
Na 2017 DRH a bin cu tres proposicion, SADA a rechasa e dos prome ya cu no tabata beneficia den nada na nan miembronan. Pero e di tres cu DRH a presenta den nomber di gobierno, e duaneronan miembro di SADA a bay di acuerdo.
“Con por ta cu e mesun proposicion cu e departamento aki a duna, awor nan ta duna un conseho negativo riba dje”, el a bisa. Pa SADA nan ta considera esaki como un falta di respet total. E ta haya cu e impacto y e señal cu a wordo manda ayera mainta ta cla. Den e caso aki segun Maduro e ministernan ta haya nan den un situacion fastioso danki na nan mesun departamento.
El a bisa cu den nan reunion, Minister di Finansa no a haya un echo e situacion di e placa pa ehecuta e structura salarial, ya cu e placa a wordo aloca caba den e presupuesto. SADA a haci un peticion pa tene un reunion cu tur e ministernan y tambe e departamentonan envolvi pa tur cos ta wordo aclaria debidamente; y asina SADA por duna su punto di bista na DRH.
E reunion aki ta programa pa dia 12 di september, caminda pa e fecha aki ambos minister tanto di finansa como di husticia a compromete pa duna un indicacion pa ki dia e asunto di structura salarial di cuerpo di duana lo keda cla. Na final di e reunion, presidente di SADA a bisa cu nan ta hopi optimista pasobra “por fin nos ta wak un luz den horizonte.”
