Gobierno di Aruba ta den contacto estrecho cu comerciantenan di caya principal y semper ta cla pa duna un man pa enrikece e experiencia di Caya Betico Croes tanto pa nos localnan como nos bishitantenan. Ministerio di Turismo y Cultura, Ministerio di Infrastructura y tambe Ministerio di Asunto General a uni den un otro proyecto pa enrikece experiencia di compras den caya grandi.
Despues di algun reunion cu comerciantenan cu diferente perspectiva pa mehoracion di experiencia den caya grandi a duna como resultado pa bin cu un proyecto di un sistema di zonido cu lo keda instala den nos caya principal pa reenforsa e experiencia di tur cu ta bin haci nan compras den Caya Betico Croes.
Ta trata aki di algun speaker cu lo keda instala den henter Caya Betico Croes y cu lo resona musica durante henter dia. Intencion ta pa tin un repertorio amplio di musica pero cu e enfoke riba nos musica local y nos artistanan local pa conscientisa tur hende di nos musica pero mas cu tur, promove locual cu ta di nos. E no ta solamente haci henter e experiencia uno mas agradabel pero ta crea e oportunidad tambe pa nos bishitantenan cera conoci cu nos cultura mas di cerca. Scuchando nos musica sigur e turistanan lo bira mas curioso y esaki lo por tin su efecto positivo pa nos artistanan unda nan lo por tin nan oportunidad pa bende nan produccionnan y asina lo por sigui menciona e cantidad di oportunidadnan economico cu e proyecto aki lo por trece cu ne.
Comerciantenan awor ta haya un man den crea un ambiente unico den nos caya principal unda mas hende lo por bin haci nan compras gosando di nos dushi musica.
Papiando di mehoracion di e experiencia di nos caya principal recientemente oficina di turismo a percura pa instala varios borchi di indicacion pa guia e bishitantenan con pa yega mas lihe na Caya Betico Croes pero tambe na nos Museonan den nos centro di ciudad y otro atraccionnan turistico. Por mira cu ya caba esaki a duna hopi bon resultado creando un fluho pa nos caya principal. Awor e intencion ta pa na momento cu nan yega nos caya grandi nan sigui disfruta di un experiencia unico riba nos isla.
Mirando cu ta trata aki di e experiencia pa nos bishitantenan y mehoracion di Producto ArubaTPEF a keda encarga cu e aspecto financiero.
Di e forma aki ta engrandece y enrikece e experiencia total di nos bishitantenan pa cu Caya Betico Croes, cu lo atrae no solamente nos bishitantenan, pero tambe nos localnan pa sostene nos comerciantenan y awor nos artistanan tambe.
