Gobierno lo entabla un caso hudicial contra parlamentario Richard Arends, si e politico di oposicion aki no presenta su carta di renuncia of retiro for di e funcion di director Financiero di Refineria di Aruba (RdA), cu el a haya prome cu eleccion ultimo.
Premier Wever-Croes a bisa cu su preocupacion mas tanto tin di haci cu e claim cu lo bin riba mesa, si parlamentario mes no ta presenta su carta di retiro for di RdA.
Gobierno no ta bay mas largo te e siman aki pa parlamentario Arends presenta e carta aki. Si e no ta hacie, Prome Minister lo duna instruccion na RdA pa cuminsa e pasonan pa disolve e contract aki. Den caso cu parlamentario Arends no ta presenta su carta di renuncia formalmente, gobierno lo cuminsa un proceso hudicial.
Asina Prome Minister, Evelyn Wever Croes a declara ayera, despues cu diamars ultimo, durante e reunion publico cu a tuma luga den parlamento pa controla e desaroyo di presupuesto 2019, parlamentario Edgard Vrolijk (MEP) a confronta e mandatario cu e pregunta, si e tabata sa di e contract aki.
E prome mandatario a declara cu tin un investigacion andando riba tur documentonan cu Parlamentario Vrolijk a presenta, pero tin algun parti cu nan mester sa kico tin para riba dje. Aunke tin firma di director di RdA, e ta prefera cu e investigacion por cana su caminda prome ya cu Alvin Koolman no ta un politico. Pero tambe tin e firma di ex minister Mike de Meza cu premier Wever-Croes a cuestiona fuertemente.
A pesar cu RdA ta resorta den su ministerio, Premier Wever-Croes a declara cu e mes no tabata sa di e supuesto contract miyonario di e parlamentario encuestion. Si Arends ta wordo retira un suma di 2.6 miyon florin e por clear, segun e prome mandatario.
El a check cu RdA, pero nan no sa nada di e contract aki. Tampoco di e supuesto carta di retiro cu Parlamentario Arends a yega di divulga. Pues si awe e carta no ta drenta pa dialuna, gobierno como shareholder di RdA ta instrui e board pa inicia e proceso hudicial pa disolve e contract aki.
El a splica cu si no tin un carta di retiro di e funcion cu parlamentario Arends a haya como director financiero di RdA, e contract ta keda valido. Y a pesar cu parlamentario Arends a anuncia cu e contract no ta valido y cu nunca el a yega di cobra un cen, premier Wever-Croes ta haya cu e no por confia riba un persona asina. Menos ainda pa e fungi den e funcion ey.
Pero e dilema ta cu si nan ta kit’e, gobierno mester paga un claim di 2.6 miyon florin. Mirando e situacion financiero dificil di gobierno, e ta un golpi duro. Si e por haya e carta di retiro for di Parlamentario Arends, e no por claim. P’esey e ta reitera cu ta importante pa Parlamentario Arends presenta su carta di retiro.
