Un biaha mas, Prome Minister di Aruba, Evelyn Wever-Croes a informa cu e frontera tanto maritimo como aereo entre Aruba y Venezuela ta continua cera. Te ainda pais Aruba no ta prepara pa un eventual fluho di Venezolano considerando e situacion interno dificil di e pais aki.
E ta consciente cu aworaki tin un grupo di comerciante cu kier haci negoshi cu Venezuela, y te hasta nan a yega di haci cierto inversion caba. Pero e Prome Mandatario tabata enfatico pa bisa nan no conta cu e posibilidad cu e frontera lo habri pronto.
“Gobierno no por habri frontera pasobra tin dos of tres Rubiano cu kier haci negoshi cu Venezuela,” el a declara.
E ta considera e asunto hopi serio y nan ta trat’e cu hopi cautela den bienestar di tur hende cu ta biba na Aruba. Y aunke e ta conbibi cu e situacion di tur Venezolano, te hasta e mes tin famia den e pais aki, pero den e caso aki nos mester pensa riba ‘Aruba prome.’
Vuelo di Aruba Airline
Sinembargo, e echo cu e compania local Aruba Airline ta cuminsa opera entre Aruba y e ciudad di Riohacha (Guajira), situa cerca di e frontera cu Venezuela, no lo cambia gobierno su decision pa mantene nos frontera cera cu Venezuela. E decision aki cu a wordo canalisa pa minister di Transporte, Chris Romero, a wordo studia bon, segun premier Wever-Croes. Nan a ricibi diferente conseho incluyendo di Hulanda tambe. E ta un vuelo -segun e mandatario cu gobierno no por stop. Ya cu nos tin tratadonan y e ta un vuelo di Colombia pa Aruba.
E prome mandatario a bisa cu e compania aereo ‘no a y no lo haya e permiso di gobierno pa bula entre Venezuela cu Merca.’ Nan a deshaci di otorga e permiso aki pasobra e no ta di e miho interes di nos pais actualmente. El a argumenta cu si un persona ta bula for di Riohacha pasa Aruba pa sigui pa Merca, e no ta contra e ciere di frontera di Aruba. Tampoco contra e ciere di frontera di Merca pa cu Venezuela, ya cu e ta sali for di Colombia.
