Manera Minister Otmar Oduber a anuncia e siman aki, actualmente ta den e proceso di limited tendering. Prome cu a inicia cu esaki, a conduci un sondeo cerca e companianan cu a participa caba cu e Request For Proposal (RFP), pa wak nan interes den un limited tendering. Di cual 11 compania a mustra interes pa participa.
Pa e periodo di 26 pa 30 di augustus 2019, e companianan a wordo invita pa un dialogo habri pa discuti cualkier punto of clarificacion cu falta. E companianan aki lo haya 90 dia extra pa prepara nan propuesta, pa asina entrega esaki prome cu fecha limite, dia 29 di november.
Si analisa e reaccion di e companianan cu a participa den e RFP cu a keda interesa pero cu no a entrega propusta, a deduci cu e companianan no tabatin suficiente tempo y tabata falta algun clarificacion riba e garantia di e ‘waste stream’. Ademas tabata den un periodo cu diferente informacion eroneo den media a crea desconfiansa. Mester enfatisa cu a clarifica e puntonan aki na e companianan.
Por menciona cu te na e momentonan aki, tin nuebe compania cu a confirma nan presencia pa e dialogo durante dia 26 pa 30 di augustus. E proceso di RFP y limited tendering ta conta cu sosten di expertonan local manera WEB y alabes WEB tin sosten di companianan y institutonan internacional, cual ta Mott MacDonald, DNV GL y NREL, cu ta institutonan renombra den e area di waste management y tambe den waste to energy.
