Ayera tardi, e palabranan di elogio di parti di e miembronan di e fraccionnan di coalicion (MEP-POR-RED) tabata notabel durante e reunion publico di control di gobierno riba presupuesto 2019.Mientras cu e unico fraccion di oposicion a bandona e sala di parlamento, debi cu gobierno no a entrega tur documento, entre nan CAft su ultimo advies.
Prome cu e debate aki a cuminsa, ya caba parlamentario Endy Croes (MEP) a duna un pabien na gobierno a base di e reportahe financiero cu nan a entrega. “Es decir un maneho, ami hasta a bisa extravagante den manera cu nos a hereda e pais aki,” el a laga sa. E reportahe financiero cu nan a obtene di gobierno, te cu dia 30 di juni tin un resultado positivo of surplus di 60.1 miyon florin pa e prome dos kwartaalnan. Esaki tabata e fuente di tur elogio riba e maneho financiero di gobierno.
Segun Croes, un logro cu a wordo obteni sin un CAft activo y un Hulanda presionando gobierno. “Nos mes a percura pa controla e pais aki di un manera decente,” el a declara durante e conferencia di prensa di fraccion di MEP. E ta spera cu e cifranan aki y loke a wordo realisa ta un mensahe cla pa Hulanda.
Croes a indica cu e presupuesto di 2019 aproba na december ultimo tabata 1.4 miyon florin pa atende cu su gastonan bou e mesun suma. Kiermen cu gobierno mester por a genera na entrada a lo menos 700 miyon y nan gastonan mester ta alrededor di 700 miyon florin. E cifranan cu a drenta na departamento di Belasting den diferente forma di entrada total ta 728 miyon florin cu gobierno a haya den caha den prome seis luna. E ta mas cu mita, e ta un 51.2% kiermen 1.2% mas di e mita cu gobierno a logra di locual a wordo presupuesta. Pa loke ta e total di gastonan di gobierno te cu 30 di juni, e ta un suma di 668 miyon florin. E ta nifica un 46.9% di gasto, kiermen 3.1% menos di loke supuestamente mester ta.
Croes ta reconoce cu ainda tin caminda cu gobierno mester atende riba finansa publico. E tendencia ta cu pa e di dos mita di aña, e gasto ta mas yegando na final di aña. Esaki ta nifica cu mas probabel ta cu mester genera mas entrada riba tur otro tipo di belasting. Pero e no ta descarta cu muy probablemente gobierno, di un manera ‘hopi facil’, lo alcansa y lo ta coherente cu e presupuesto 2019 aproba pa parlamento.
Croes a declara na Bon Dia Aruba cu e reportahe di e dos prome kwartaal aki a wordo traha pa departamento di Finansa, pero cu cooperacion di departamento di Impuesto, Duana y departamento di Recurso Humano (DRH). Tambe el a menciona cu tin un sector colectivo a base di palabracion cu Hulanda, unda tin cifranan di instancianan manera, entre otro, AZV SVb, ATA, Universidad di Aruba y Serlimar.
Encuanto si a tene cuenta cu e reportahe y cifranan di Banco Central di Aruba, Croes a argumenta cu e instancia aki ta bin cu cifranan mas despues, te ora cu nan tambe ta cuminsa haya rapportnan di tur e otro institutonan cada kwartaal. “Banco Central por ta tin cifra di aña pasa… pero nos lo tene di nan tambe,” el a bisa. Mientras cu loke ta wordo trata den parlamento ayera y awe tin di haci cu e cifranan di e realisacion di e prome seis lunanan.
