Intimidacion sexual na pia di trabou ta un topico di caracter social cu ta hopi importante pa comunidad y mester ta riba e agenda politico, pa motibo cu e dignidad di cada persona y di cada ser humano ta trece cune e libertad di cada individuo; pero na mesun momento, ta trece pa cada un di e personanan tene cuenta cu e derecho di otro.

Esey tabata e palabranan cu Ryçond Santos do Nascimento a expresa durante un entrevista cu Bon Dia Aruba a haci cune. El a comenta cu den comunidad, hopi biaha e dignidad no ta haya su luga debido, cu hende ta pasa den situacionnan den cual nan no ta haya respet, un derecho fundamental di cada persona.

Santos do Nascimento a informa cu dia 27 di augustus proximo lo tuma luga na Cas di Cultura desde 6.30 di atardi e charla ‘Intimidacion sexual na pia di trabou’. El a informa cu su persona hunto cu Muzaninn Wever y Parlamentario Jennifer Arends Reyes (AVP) ta organisa e evento aki, cu lo tin como oradornan Sandra Brown y Karin Bosman, den cual nan lo bay papia tocante e situacion laboral unda cu e personanan tin un hefe, colega of un empleado na trabou cu ta sufri di intimidacion sexual, cua ta e solucionnan y ki caminda tin pa e victimanan.

Den su opinion, Santos do Nascimento a splica cu den comunidad hopi biaha ta existi e situacion aki, mayoria ta hende muhe cu no ta wordo respeta y e falta di respet tin un componente sexual cune; tin di haber cu cultura ‘machista’, pensamento anticua y principalmente actitud cu mester cambia pa trece mas igualdad na pia di trabou.

“Nos como hende homber tambe mester asumi nos responsabilidad den e problema aki, cu hopi biaha nos ta e causante”, Santos do Nascimento a destaca.

Tambe el a sigura cu mester reconoce e problema y tuma responsabilidad den dje, busca un solucion di con por transforma, principalmente e relacion na pia di trabou, di un manera mas respetuoso, pa crea un situacion di mas siguridad. Un persona cu ta wordo intimida no ta haci su trabou di un manera efectivo y e problema ey ta bira problemanan na cas, ta refleha riba e trato di e muchanan, trato entre pareha, por tin hopi consecuencianan.

Santo a bisa cu Karin Bosman, un di e oradornan di e charla, ta un persona cu a experiencia intimidacion y acoso sexual na pia di trabou personalmente y e ta un persona cu ta hopi activo riba e area di busca solucion pa e tipo di problema aki. E otro orador cu ta Sandra Brown, ta un persona hopi conoci den comunidad y e lo bay elabora riba e parti di accionnan cu e persona por tuma pa proteha nan mes.

Di mesun manera, Santos do Nascimento a señala cu esaki ta un hecho social cu tur hende mester papia di dje den comunidad y tambe a duna di conoce cu ta existi casonan cu a bay dilanti hues, unda e personanan a perde nan trabou pa e motibo aki y tambe tin algun cu a gana nan caso.

Na nivel internacional, Santos do Nascimento a comenta cu ta existi tratadonan internacional riba e topico aki y cu aña pasa a crea un tratado nobo cu tin relacion cu e hecho, pero no a wordo ratifica pa hopi te ainda, pa motibo cu ta un proceso largo.

Un parti di e problema ta, segun Santos do Nascimento a duna di conoce, cu e personanan no ta denuncia pa via di miedo, miedo pa perde trabou of miedo pa represalia, pero poco poco e hende ta mas receptivo pa tuma accion y pa para pa nan mes na pia di trabou.

Di otro banda, tambe ta necesario pa conscientisa kico ta un intimidacion sexual, kico por haci y kico no, si un piropo ta aceptabel of no, ta un parti di educa comunidad.

Pa finalisa, el a bisa cu na e charla, personanan presente lo haya mas informacion di forma mas formal:ki manera tin pa e personanan entrega un keho, cu ta parti di un proceso, otro parti importante ta con e persona por siña pa bisa ‘NO’, cu ta parti di e solucion.

“Cada persona merece respet y tin dignidad cu ta inherente, y tur tin cu respeta e derecho ey”, el a conclui.