Mayoria di sociedad ta declara contra di maltrato animal. Nan ta rechasa violencia contra toro, prizon manera zoologico y circo cu ta humilia e bestianan. E defensor di bestianan ta esun cu ta encarga di informa tur hende cu sociedad no ta indiferente pa cu e sufrimento di bestianan y cu nan kier un cambio den e politica ey.

Durante un entrevista special cu Bon Dia Aruba a haci cu Zoey Conijn, fundado di Luna Foundation Aruba, el a splica con e fundacion ta educa y ta ofrece ayudo cu e bestianan riba e isla.

Zoey Conijn a nace na Hulanda pero desde chikito el a bin Aruba y regresa Hulanda. El a sigura cu amor pa bestia semper tabata existi. Desde 10 aña pasa cu el a yega Aruba ultimo, el a ripara cu hopi bestianan tabata riba caya. Conijn a manifesta cu el a traha cu hopi fundacionnan como boluntario, pero ni un di nan tabata haci educacion.

“Si bo no educa nos hendenan con pa zorg pa nan bestia, semper bo lo tin e problema cu nos tin awor”, Conijn a expresa.

Di mesun manera, el a duna di conoce cu Luna Foundation no ta un fundacion cu ta rescata bestianan, nan ta yuda ora cu nan por haci esey den e refugio chikito cu nan tin, pero el a afirma cu e obhetivo ta pa educa e muchanan, cu nan ta e cambio cu Aruba mester pa e bestianan no keda sufri y asina e fundacion a nace.

Conijn a sigura cu e miho experiencia cu el a haya door di su vocacion, ta e cambio den e hubentud. Den e tempo aki, hopi muchanan cu ta hoben adulto ta esunnan cu ta yuda y esey ta e experiencia mas positivo, cu nan ta parti di e cambio.

“Nos por yena e tereno aki cu cacho of pushi, pero si nos no conscientisa nos muchanan, si nos no trece nan aki pa nan mira e diferencia entre un cacho riba caya y ora nan ta bin aki pa haya cariño y amor, esey no tin sentido”, Conijn a bisa.

Tocante algun medidanan cu gobierno ta implementa pa abandono di bestia, el a sigura cu comunidad mester ta educa. Hopi hende ta bisa cu gobierno mester haci mas, pero nan ta limita den loke nan por haci, nan por keda hinca placa den fundacionnan pa sterilisa e bestianan, pero si nan no educa e hendenan, con e cambio lo bin?

“Educacion ta e unico manera pa cambia loke ta pasando. E no lo cambia di un dia pa otro, pasobra e problema cu tin riba caya no a bin di un dia pa otro, e lo tuma su tempo. E proposito di Luna Foundation ta pa existi pa 5 aña y den tempo ey nos lo kier educa lo mas cu nos por”, segun Conijn a expresa.

Di loke ta trata e ‘Kill Cage’, el a informa cu esey no ta cachonan so, tur sorto di mascotanan ta para eynan. Manera el a comenta: “Hopi hende kier pa cera e ‘kill cage’ pero si bo ta cera esaki, unda tur e bestianan ey lo bay?”
Di mesun manera el a duna di conoce cu pa aña, 6.000 bestia ta wordo mata den e ‘kill cage’.

Tambe el a papia tocante hende cu tin nan mascotanan mara, abou un mata, cu esey nan ta pensa cu ta suficiente. Pero loke e personanan mester, e mascotanan tambe mester y esey nan ta bisa den scolnan pa e muchanan siña.

Di mesun forma, el a informa cu nan tambe ta ofrece casnan traha cu palo pa personanan por tin den cura di nan cas, traha pa e cachonan no ta bou e fuerte solo of awasero mas.

Pa finalisa, Zoey Conijn a sigura cu hende mester educa nan mes. Prome cu un persona tuma cualkier bestia, mester haci un investigacion tocante ki costonan ta encera pa duna e bida cu e animal mester, no djis pa un bestia por cuida un tereno. Nan tin cu bay dokter veterinario, nan tin cu come, cada aña nan mester haya vacuna y si e persona no tin e recurso suficiente pa adopta un bestia, por fabor no haci esey.