16 di augustus ta fecha cu Cuerpo Policial di Aruba ta conmemora/celebra, pero mas cu tur cos reflexiona y gradici nos Creador pa e proteccion pa tur cu ta forma parti di Cuerpo Policial di Aruba. Pa e ocasion aki a invita dignatario- y miembronan di Cuerpo Policial pa yega hunto na Christ Church Methodist na San Nicolas pa un mainta di ofrenda.
Robert Candelaria, awe politico y miembro di Parlamento, ta recorda con tempo e tabata hopi mas hoben, a cuminsa cu e celebracion aki. Y tambe tin un opleidingschool awe cu ta cumpliendo 45 aña caba di existencia.
Ta hopi importante, Candelaria a bisa, pa para keto na cierto logronan y refleha. Den un discurso sumamente elocuente di e Pastora, el a trece dilanti e motibo pakico un polis t’ey pero tambe accentua dicon ta haci e trabou di polis. Den 8 ora di un warda, por cuminsa un dia dunando un abraso di consuelo na un hende, of na mes momento detene un otro hende, of haci uzo di bo arma cual ta haci e trabou di polis uno duro y cu ta hiba esunnan den funcion den un escala di emocion cu ta subi y baha continuamente. No ta tur ora bo tin e manera corecto pa atende, pero semper mester tene na cuenta cu como cuerpo tin cu aten’e, para keto y refleha mira mas dilanti pakico nan t’ey, unda kier bay y con pa sigui. Esaki ta locual e pastoor a trece dilanti diabierna mainta den e servicio.
Bunita palabranan di reflexion/ motivacion pa asina stimula Cuerpo Policial. Mirando den tur dificultad cu ta pasando aden, no mucho siman atras e Cuerpo a haya nan cu e buskeda di fugitivo y ta logra gara e persona aki, pa algun dia despues bolbe haya nan den e presion cu e situacion ta ripiti. Sin lubida cu varios di e hendenan aki ta personanan cu a keda deteni pa casonan grandi y pisa den comunidad. E mesun polisnan aki tin cu sigui traha tur dia. Ta un trabou cu ta exigi hopi y pa e motibo aki ta importante pa para keto y mira cu e ta keda un cuerpo importante y tin cu dun’e e reconocemento/ gradicimento cu elogio pa e bon trabou cu nan ta desplega cada dia, a pesar di tur e retonan cu nan tin.
Parlamentario Robert Candelaria ta menciona tambe e hecho cu e fecha aki ta uno hopi importante mirando cu e ta e fecha natalicio di Watty Vos en feliz memoria. No solamente un ex Minister pa Aruba, cu ta gosa di aprecio grandi di e comunidad te cu dia di awe, pero tambe full Antias den su tempo. Ta un persona cu a haci hopi pa Aruba, hopi pa Polis caminda tin un Cuerpo Policial educando polis pa añanan danki na su trabou. Un reconocemento chikito den apertura di un caretera cu ta hiba su nomber, pero tambe ta e persona responsabel pa tin hopi polis awe incluyendo Candelaria mes cu ta/a traha den Cuerpo Policial Aruba y a huramenta cerca Watty Vos den feliz memoria. Un fecha cu tin cu para keto y duna e reconocemento y e honor na e persona y e trabounan grandi cu el a haci pa nos comunidad.
