Den cuadro di e discusion actual di cambiamento y introduccion di leynan nobo, Bon Dia a puntra Parlamentario Xiomara Ruiz Maduro su opinion riba con ta trata cu prioridad pa locual ta tratamento di ley den Parlamento, riba kico esaki ta basa y si tin algun ley cu por pasa mas prome cu otronan aunke cu nan no ta realmente prioridad real di e pueblo di Aruba.
”E prioridad den parlamento ta wordo stipula pa e fraccion di mas grandi, esey ta e realidad.
Kiermen, si nan no ta mira e importancia, nan no ta yama e otro leynan” Sra. Maduro a bisa. Ta asina cu Parlamento ta haya e leynan di gobierno, pues gobierno ta adapta un ley anto esaki ta bay den e molina di departamento di legislacion, pues nan ta trah’e anto e ta bin Parlamento.
Ora e ley aki yega Parlamento, mester yama un comision central, den cual e ora ta dicidi kico ta bay haci cu e ley. Den e periodo aki, Parlamentarionan ta haci pregunta anto tambe por dicidi pa bay reuni cu un fundacion cu ta trata cu e asunto of e oficinanan y departamentonan di gobierno cu ta atende e ley aki pa sa mas con esaki ta den practica y contesta pregunta riba dje . ” E ora eynan, abo como Parlamentario ta formula bo preguntanan, bo ta haya te tanto tempo pa bo formula esey, anto gobierno ta contesta bo. Pa ora cu e contestanan yega, e ora eynan masha lihe mes e reunion publico ta wordo agenda” , Sra. Maduro ta splica Bon Dia. Locual ta pasa ta segun Sra. Maduro, tin diferente ley cu ta bini pero miembronan di Parlamento tambe por pidi reunionnan ariba topiconan cu pueblo ta haya cu ta importante.
Normalmente, reglamento di ordo ta bisa cu ora cu parlamentarionan pidi un reunion, esaki tin cu wordo yama dentro di 30 dia. ”Nos a pidi un reunion na januari e aña aki ariba e fiesta di tereno, caminda ta partiendo tereno sin tene consideracion cu entre otro naturalesa ni bienestar di e pueblo anto ningun hende no a yama esaki ainda kiermen nan ta gewoon trapa riba reglamento di ordo” , Sra. Maduro a bisa .
Ora cu por ehempel a trata e ley di cacho, a bini hopi zundra pa motibo cu tin tanto otro ley pendiente y net riba esaki kier a bay atende. ”Atrobe, ta nan ta bisa cu no, esaki ta cla pa wordo trata mescos e ley di Alcohol cual atrobe tabata un ”ley di iniciativa” , nan a bisa cu no, e ta completamente cla y nos ta trat’e. E ley di Plastic tambe tabata ”ley di iniciativa” di un Parlamentario cual tabata completamente cla y nan a trat’e tambe, pero tin leynan manera e Codigo Civil cual ta un hopi amplio, mester a sinta cu un cantidad di experto pa nan duna splicacion, pero atrobe, esaki ta un ley masha grandi mes, pa colmo awo ta bin un amienda den dje cual ta causa hopi preocupacion den comunidad di cual eigenlijk nos ta di opinion cu e cos aki mester a wordo trata apart y no sin mas como un amienda tratando di ley cu ya caba den dje tin cambio grandi.
Awo por ehempel, tambe a yama reunion pa e ley di All Inclusive pa dia 19 siendo cu nos sa, y Parlamento ta consciente cu Raad van Advies ta bisa pa no presenta e ley den e forma ey na parlamento, y mas importante ta cu no tin ningun investigacion haci pa locual ta e impacto di e ley aki riba e economia di Aruba” , Sra . Maduro a splica.
Pueblo mester vocifera nan deseo, pero esaki ta yuda?
Segun Sra. Maduro, ta importante pa pueblo vocifera kico ta e deseo pa e ora representante di pueblo tuma esaki over y haci un trabao di dje. Tin hopi cu ta haya cu tin un cantidad di leynan mas importante cu por wordo pasa awo por ehempel manera e ley di abuso sexual di mucha, kende tin hende ta warda añanan riba un solucion pa esaki, sinembargo nan no ta wak cu esaki ta wordo hiba dilanti mesun lihe cu otronan.
”Den e ley di codigo civil riba su mes tin hopi cambionan caba anto bo ta wak cu esaki a bay den un proceso caminda cu e huristanan a purba pa bay cu locual ta e deseonan pa hinca esakinan den e ley. Un ley grandi bo no por trata via porta di patras, bo tin cu trata esaki via porta di dilanti, cu otro palabra, den caso di Codigo Civil por ehempel, bo tin cu trat’e den un ley apart y un debate apart, y no un debate cual aworaki tin cu bay ariba e cambionan grandi caba cu ta bay tin den e codigo civil manera cu e ta riba e agenda aworaki. ” Segun Sra. Maduro,
Esaki ta un topico cu por papia basta di dje pues Bon Dia a combersa cu Parlamentario Chris Dammers y a puntra su opinion tambe riba esaki cual bo lo por lesa den e siguiente edicion di Bon Dia Aruba.
