Mañan dia 16 di augustus ‘Medicine is Exercise’ lo tuma luga na Renaissance Hotel cu e participacion di mas di 80 persona profesional den area di salud y actividad fisico, kende lo ricibi informacion pa extende nan conocemento y pone den practica e guia y normanan di e programa mundial aki.

Durante un entrevista cu Bon Dia Aruba a tene cu Rudy Leysner, presidente di Fundacion Movemiento ta Bida, el a duna di conoce cu e tayer ‘Medicine is Exercise’ ta algo global y uza na 60 pais unda dokternan y personanan cu ta traha den salud ta prescribi actividad fisico como un remedi, habilidad pa educa y cambio den estilo di bida.

E tayer di ‘Exercise is Medicine’, ta un vision comparti entre American College of Sports Medicine y American Medical Association. E meta ta pa yuda yega na un miho salud y tambe un miho calidad di bida di cada persona, incluyendo e pueblo di Aruba en general, pa medio di conseho y recomendacion individual di actividad fisico.

Leysner a informa cu esaki a yega na Aruba 10 aña pasa cu e dos persona encarga di e tayer, Dr. Christian Mejia y su persona mes, kende a asisti pa varios conferencia pafo y tambe nan a asisti pa ‘Exercise is Medicine’ na Bogota Colombia pa haya certificado internacional y for di e momento ey e training a cuminsa cana y pa cada aña nan ta invita pa asisti pa e diferente reunion regional y congreso internacional na Merca.

Di mesun manera, Leysner a bisa cu e personanan cu ta director regional di Latino America cu ta Sandra Matsudo-Mahecha y John Duperly, dokternan y investigadonan specialisa riba actividad fisico lo ta e speakernan encarga cu lo ofrece un parti teoretico y practico den e tayer aki.

Cu e conocemento ey e profesionalnan por siña comunidad con pa medio di e movecion y cambio den estilo di bida pa ta mas saludabel, en bes di uza pildo como prome opcion, esaki ta un paso grandi den prevencion di malesa y promocion di salud.

Esaki ta importante pa comunidad di Aruba pa motibo cu Leysner a expresa cu e gastonan pa cuido di salud ta subiendo y por ripara cu mas personanan hoben ta haya malesanan cronico y cu esaki e personanan mes por cuminsa preveni esaki. “Esaki ta un efecto cu hende tin cu cuminsa habri nan wowo, cu prevencion ta e yabi pa salud, pero mester cuminsa for di chikito”, Leysner a sigura.

Asina mes, Leysner a declara cu mientras mas hende ta informa tocante esaki ta miho. El a manifesta cu ‘hopi biaha nos kier pa esunnan cu ta tuma decision y esunnan cu ta haci e parti practico ta hunto y pa nan siña un cos cu tur hende ta papia bou mesun nivel’.

Estilo di bida no ta solamente e parti di actividad fisico, tambe ta e parti di alimentacion, e parti spiritual tambe ta conta, si tur cos ta den un bon luga, comunidad por haya hobennan y adultonan mayor saludabel, cu por depende riba nan mes cu calidad di bida mas largo.

Ademas, el a menciona cu Aruba tin un problema hopi grandi door cu e personanan no tin movemento y e alimentacion tambe ta malo. Ta existi muchanan cu tin diabetes, sobrepeso y esey ta muchanan cu no lo bay ta un adulto saludabel y kisas nan no lo por yega te adulto mayor, ademas di e gastonan cu lo tin hunto cu esey lo yega un momento cu nan lo tin mester di ayudo.

Pa finalisa, Rudy Leysner a menciona cu e comunidad mester bira mas consciente, inverti mas den nan salud, mientras mas esaki ta promove e hende por bira mas responsabel.