Ministerio di Relacion Exterior di Barbados a confirma diasabra pasa,den un comunicado, e suspension na su teritorio di e dialogo entre regimen di Nicolas Maduro y oposicion Venezolano.
Sin brinda mas detaye, e texto ta bisa cu e regimen di e Nicolas Maduro a dicidi di lanta di mesa di dialogo pa motibo di e apoyo cu Presidente interino di Venezuela, Juan Guaido, a duna na e blokeo di Estadonan Uni contra administracion di Maduro.
Prome Minister di Barbados, Mia Mottley, a duna bonbini luna pasa na inicio di e combersacionnan cu tin apoyo di e paisnan di Comunidad di Caribe (Caricom), cu e speransa cu e dialogo lo por a pone un fin na e crisis na Venezuela.
Guaido despues di e retirada di Maduro di e cita na Barbados a bisa, cu mester aumenta e presion riba gobierno di Maduro.
“Esaki ta un asunto cu ta rekeri pasenshi maximo. Ora tin division asina profundo ta tuma tempo pa alcansa un acuerdo,” Mottley a bisa tocante e combersacionnan entre e partidonan na mesa.
Noruega, cu a actua como mediador den dos reunion teni na e capital di Barbados, Bridgetown, a duna señal inicialmente cu e partidonan tabata delibera ainda riba continuacion di e dialogo na Barbados, mientras cu e delegacion di Maduro no a presenta diahuebs pasa na Barbados pa continuacion di e negociacion.
Segun e diario Spaño Alnavio, e mediadornan Noruego no ta sorprendi cu e retirada di e delegacion Chavista, pero no ta descarta cu nan lo bolbe. Gobierno di Maduro a yega Oslo y Barbados pasobra nan tambe ta bao presion di Rusia y China, principalmente, pa yega na un solucion negocia. E situacion ey no a cambia.
