Huawei a revela ayera e sistema operativo (OS) pa smartphone cu lo por reemplasa Google su Android, asina agregando na e compania gigante di tecnologia su esfuersonan pa proteha su mes contra sancion Mericano.
E anuncio di HarmonyOS ta mustra cu Huawei, actualmente e di dos marca mas grandi di smartphone mundialmente, tin e capacidad pa crea tecnologia pa reduci su dependencia riba comercio Mericano.
E sancionnan cu Merca a impone den mei tabata un atake directo riba Huawei su benta di smartphone por medio di limita acceso na e sistema operativo Android, y servicionan di Google, cual ta cay bou Alphabet Inc.U.S.
Huawei Technologies Ltd. kier sigui uza Android, asina Richard Yu, CEO di e compania su division encarga cu producto pa consumido a bisa durante un conferencia pa desaroyado di software den e ciudad den sur di China, Dongguan. “Sinembargo, si nos no por uz’e den futuro nos por cambia inmediatamente pa HarmonyOS,” Yu a bisa. El a bisa cu esey por a pasa den corto plaso: 2 dia, ‘si ta necesario’.
Huawei, China su prome marca di tecnologia global, ta memey di un bataya entre Washington y Beijing tocante e Partido Comunista su ambicion pa desaroya companianan cu por competi den robotics y otro area tecnologico. Trump su gabinete a bisa cu Beijing su esfuersonan ta basa riba horta of pone presion riba companianan pa duna nan e tecnologia cu nan tin diponibel. Washington y otro partnernan di negoshi ta bisa cu e campaña Chines ta violando obligacionnan pa tene mercado habri.
Merca ta wak Huawei como un compania cu lo por forma un riesgo pa siguridad, ademas di posibelmente kita e dominio global di compania Mericano den varios mercado. Huawei ta gasta 12 biyon dollar pa aña riba chipnan semiconductor Mericano, ademas di otro componentenan pa traha smartphone. E compania a bisa cu e medidanan pa limita e exportacion pa Merca lo corta nan benta premira cu 30 biyon dollar durante un periodo di 2 aña.
Pa purba combati esaki Huawei a cuminsa desaroya su propio chipsetnan pa servernan y smartphone di e mercado ‘low-end’ (lesa: mas barata), maske nan tin mester di Merca pa nan productonan mas avansa. E prome producto, cual ainda no lo ta un smartphone, cu lo uza HarmonyOS lo lansa awe, bou nan marca ‘Honor’. HarmonyOS lo ta un sistema ‘open source’ (lesa: no proprietario, habri pa contribucion externo) pa asina otro desaroyado di software tambe lo por contribui na su desaroyo, segun Yu. Google su Android tambe ta open source, excluyendo e servicionan cu Google ta inclui, y ta conta cu contribucionnan di software di varios compania y individuo rond mundo. Android ta uza e sistema Linux, cual tambe ta open source. Yu a bisa cu nan kier crea un sistema operativo global, ‘cu no djis Huawei lo bay uza’.
