Cartel Santa Rosa de Lima por tin su dianan conta, despues cu nan a haya un declaracion di guera di grupo di Nemesio Oseguera, conoci como ‘El Mencho’. Aunke e enemistad entre ambos grupo delictivo a surgi for di 2017, den ultimo simannan e enfrentamentonan arma pa control di e zona denomina “E Triangulo di Bermuda” (Guanajuato) a incrementa cu hopi violencia.
E cartel di Guanajuato di Jose Antonio Yepez, alias “El Marro”, cu a surgi na 2017, por a fortalece su mes rapidamente, concentrando nan actividadnan den un economia criminal: E asina yama huachicoleo (robo di combustibel, den un region forma pa e ciudadnan Apaseo El Gran, Salamanca, Leon, Irapuato y Celaya, como tambe e poblacion chikito di Santa Rosa de Lima, cual nomber e cel a tuma pa su mes.
Aunke “El Marro” tabatin un decada dedica na robo di combustibel, el a haya mas nomber na october 2017, despues di manda un advertencia fuerte na Cartel di Jalisco Nueva Generacion (CJNG). Den un video e ta maldiciona nan y ta bisa nan pa keda pafo di Guanajuato.
For di e tempo ey, e guera sangriento entre ambos grupo a hiba violencia na tal grado cu e region a bira na 2018 un di e zonanan mas mortal di e pais. Siman pasa, den solamente cuatro dia a conta 35 persona morto den diferente suceso na Guanajuato y na municipionan manera Leon, Celaya, Irapuato, Salamanca, Penjamo, Valle de Santiago, Villagran, Apaseo El Grande y Salvatierra.
Te awor e Cartel di Santa Rosa de Lima tin ambicion di converti den un grupo criminal den varios estado, comparabel cu algun di e mas grandinan di e pais; sin embargo, su futuro ta pinta scur.
