E consehero di Siguridad Nacional di Cas Blanco, John Bolton, a declara ayera den e conferencia internacional pa democracia na Venezuela cu e paisnan reuni na Lima ta apoya e blokeo contra regimen di Maduro anuncia pa gobierno di Trump.
Relaciona cu e dialogo na Barbados, e asesor a señala cu “Nos ta mira Maduro uzando e mesun practicanan bieu, pretendiendo di ta interesa den dialoga, mientras nos tur sa cu e ta solamente cumprando tempo. Nos no lo cay den e trikinan bieu aki di un dictador cu ya a caba. E tempo di dialogo a caba.”
Bolton a splica cu e reciente sancionnan di gobierno Mericano contra regimen di Maduro “ta un paso mas tuma cu e intencion di nenga Maduro acceso na e sistema financiero global y pa isola nan mas ainda internacionalmente. E sancionnan ta aplicabel tambe contra cualkier individuo stranhero cu ta duna apoyo, bienes o servicio na e personanan inclui den e listanan elabora pa Washington.”
Ta pa prome biaha den 30 aña cu ta aplica un medida similar riba continente Americano, cu Bolton a compara cu e embargonan imponi riba regimen di Manuel Noriega na Panama (1988), Nicaragua (1985) o e congelacion integral di bienes y e embargo comercial pa Cuba na 1962.
“Merca a uza herment similar y hasta mas agresivo contra Iran, Corea di Norte y Siria. Awor Venezuela ta parti di e club exclusivo aki di estadonan bandido,” e experto di siguridad a bisa.
Bolton a aclara tambe cu den e medida, Washington ta “cuidadoso” pa salvaguardia acceso di pueblo di Venezuela na bienes humanitario y pa cubri nan necesidadnan basico.
“Nos a actua pa proteha Presidente Interino Guaido, Asamblea Nacional y nan aliadonan emitiendo 21 licencia general pa algun actividad, manera provee bienes humanitario, post, telecomunicacion, internet y actividad di organisacionnan internacional o no gubernamental.”
