Den luna di october lo tuma luga e training mediacion ‘Mediationbureau talking is solving’ hunto cu De Waart Mediation & Training’ cu ta duna capacaticacion y entrenamento den medionan di comunicacion.

Barbara Abdoelkariem, kende ta un hurista, ta kende ta splica tocante e curso. E persona lo siña conocemento, abilidad y actitud cu un mediado mester pa por intermedia efectivamente. E fechanan lo ta riba 15, 16, 17, 18, 21, 22 di october 2019 na Aruba. Nan lo tuma luga den edificio di corte di prome instancia.

E curso di mediacion ta encera den bida priva y profesional
Den bida priva y profesional hende ta haya nan mes den intercamio di palabra cu por yega na un momento di pleito of persona ta stop di papia cu otro. Segun Abdoelkariem un conflicto por daña relacion entre amigo, trahado, hefe y trahado, bisiña of te famia.

Tin biaha cu hende no sa mas kico pa haci pa resolve un conflicto. E problema ta singui sin solucion. Un conflicto tin emocion pa hende specialmente si ta un conflicto na trabou, den famia, of bisiña. Si ningun persona ta haci algo pa resolve, ta sigui cu por trece consecuencia grandi.

Mediacion ta un manera pa resolve un conflicto. Si un persona no sa kico pa haci, e por acerca un mediado pa ricibi ayudo. Un mediado ta independiente y ta percura pa haya un solucion pa ambos partido.

E mediado no ta tuma parti, e ta uza su abilidad di intervencion pa yuda hende compronde otro miho y asina yega na un solucion. Tin momento pa consulta of negosha si e otro persona ta keda riba su punto y no ta wak e otro banda di e situacion.

Den un situacion asina, abilidad di intermedia por yuda pa persona por combersa of negosha. Cu abilidad di intermediacion/ mediacion hende por resolve conflicto of percura cu un situacion no bira un conflicto.

Diferencia entre asistencia di Mediacion, di Abogado y decision di Corte
Segun Abdoelkariem e parti positivo di mediacion ta cu e solucion ta bin for di e mesun persona. Nan mes ta dicidi si e solucion ta pa resolve nan conlficto of no. Si tin emocion durante e proceso di mediacion cu por ser atendi.

E gasto pa un mediadio ta mas abou compara cu un Abogado. Na final e meta ta pa resolve e conflcito. Abdoelkariem ta bisa cu ora hende ta bay un Abogado of Corte nan mes no tin control mas riba conflicto. E Abogado ta haci e conflicto huridicio y un Hues ta dicidi riba ley.

Den proceso di mediacion hende por papia riba locual ta importante pa nan yega na un solucion pa nan conflicto bou di guia di un mediadio independiente. E mediado ta eynan pa guia e proceso di mediacion tambe ta percura cu tur hende ta haya oportunidad di papia.

Formacion den abilidad di mediacion, formacion acredita pa mediadio
Na Aruba, Abdoelkariem e ta splica cu tin compañia por inverti den esaki, mirando cu na otro pais manera Merca, Hulanda y China mediacion ta algo cu ta mas preferi cu bay corte. Mediacion por ser uza pa realisa cu mantencion di un relacion y drecha di un relacion ta importante pa bay dilanti den bida priva, economico y administrativo.

Na januari 2018, Corte di Husticia na Aruba a cuminsa cu referi riba algun caso pa mediacion. Pa un Hues referi un caso na un mediado, e Mediado mester ta un Mediado registra of reconoci. Pa Aruba, lo ta importante pa tin Mediadonan local. Nan ta conoci cu e comunidad di Aruba y esey ta yuda haci e trabou como mediado.

Pa finalisa, Abdoelkariem a bisa cu e formacion ta duna profesionalnan na Aruba mesun oportunidad cu e profesionalnan cu ta haci e formacion na Hulanda of Corsou.