No tur hende ta consciente di e 17 Metanan di Desaroyo Sostenibel (SDG) proponi pa Nacionnan Uni pa logra nan pa 2030. Esaki ta haci cu no tur pais ta cana pareu den e mesun ritmo pa alcansa e metanan aki pa 2030. Sinembargo esfuersonan ta wordo haci den nos pais pa tur hende por bira consciente di e SDG, y asina uni esfuerso pa finalmente nos como Aruba por haci uzo di e SDG den nos bida personal.

Joase-Ann van der Biest, kende no ta un persona desconoci den e mundo cultural na Aruba ta gerente di BAZ-RRR Galleria & Brasserie. E tres R aki no ta pa pret, sino cu nan tin un significante real: Reduci, Reuza y Recicla. Nan a dicidi cu BAZ-RRR Galleria & Brasserie no ta gewoon un negoshi, sino un negoshi cu un concepto hopi singular na Aruba, esta un negoshi cu proposito. Aunke e tres R ta algo generalmente relaciona cu elemento cu tin di haber cu plastic y papel pa recicla nan, pero tambe e tin cu haci cu cosnan di nos bida diario. Pa ehempel artefacto cu tin biaha nos ta prefera di benta afo, mientras cu otro hende si por haci uzo di dje.

P’esey nan kier motiva y inspira comunidad henter cu mescos cu nan ta sostene y forma parti di e SDG. “Esaki ta algo cu comunidad por haci,” van der Biest a bisa na Bon Dia Aruba.

Compromiso cu SDG
Ta asina cu pa duna contenido berdadero na nan filosofia comercial, nan a cuminsa cu un serie di break out session cu tin di haci cu e SDG. E ta un sesion informativo y educativo caminda tur fin di luna ta wordo organisa un seccion cu diferente orador. E ta tuma luga den un forma interactivo cu e publico presente.

Ya caba nan a tene e prome sesion caminda nan a enfoca riba e meta 5 dedica na ‘igualdad di genero’ y e meta 11 cu tin di haci cu comunidad sostenibel. Pa ehecuta esakinan, ta traha den colaboracion cu otro instancianan y personanan, entre nan cu Blanca Pietersz di 360 Degrees Innovation. Tambe cu e ingeniero Rafi Kock kende a atende cu e meta 11 durante e prome sesion. Den esaki, nan no kier solamente traha cu sector priva y gremio di empresarionan, sino cu nan kier involucra comunidad henter, specialmente si ta referi na e meta 11, esta ‘Sustainable Cities and Communities’. E idea di colaboracion cu tambe ta parti di un di e SDG ta pa canalisa tur informacion. Nan ta 17 meta y nan no ta bay categorisa un of dos den un anochi di sesion. Pues ainda nan tin te 2030 pa sigui traha riba e SDG.

Van der Biest a bisa cu nan proyecto ta totalmente inspira pa SDG. Esaki ta un iniciativa cu a duna fruta a base di diferente combersacion cu nan a sostene pa haci e galeria aki multifuncional y cu proposito. P’esey nan ta carga e meta di e tres R; y tambe nan ta carga e logo di Sustainable Development Goals. Nan kier informa y educa cada persona, kiermen e comunidad completo ariba esaki. Pero tambe pa nan wordo envolvi pa alcansa nan.

Pa van der Biest e sesion informativo y educativo cu nan a start siman pasa ta hopi importante, ya cu e personanan envolvi sa hopi di e SDG; pero comunidad mes, tanto local como bishitante, ta puntra cosnan cu ta refleha cu no tur hende sa di e SDG. P’esey bou e capa di e multifucionalidad di e galeria, y mirando cu nan tin e establecimento ideal pa bin cune den pleno curason di Playa, nan a dicidi di informa y educa riba e SDG.

Nan ta situa na Margarita Plaza na Emmastraat 3, na otro banda di La Linda di mucha y banda di Sport Caribe. E sesion aki ta completamente gratis. Asina nan ta duna contenido na e aspecto di inclusion. E ta un evento habri pa tur persona cu ta interesa di sa mas di e SDG, pero tambe di arte y cultura.