Den e serie di CBS Hulanda ‘Statistische Trends’ a keda publica un analisis di e futuro demografico di e islanan Bonaire, Sint Eustatius y Saba, pa e periodo 2019 – 2050. Desde cu e islanan aki a bira municipio special (bijzondere gemeenten) di Hulanda na 2010 e poblacion di Bonaire a crece cu 25%, na Saba el a crece levemente y na Sint Eustatius e poblacion a disminui levemente.

Na tur e islanan den e periodo ey migracion for di exterior tabata e elemento mas importante den crecemento di poblacion. Segun e pronosticonan nobo pa e islanan e poblacion na e tres islanan lo crece te cu 2045 cu 21%, pa despues yega na un paro. Principalmente Bonaire lo conoce un embeyecemento fuerte den e periodo venidero.

Pa prome biaha desde 2005 y desde e cambio pa bira parti di Hulanda na 2010, CBS a traha un pronostico di poblacion pa e islanan. E ultimo pronostico a describi e periodo di 2005 – 2030. E pronostico nobo ta describi e crecemento anticipa pa e periodo 2019 – 2050. E pronostico ta trata di calcula e desaroyo mas probabel, a base di e informacion cu ta actualmente disponibel. E desaroyo berdadero lo por desvia di esaki, segun e investigadonan. Principalmente pa motibo di e cambionan repentino den inmigracion y emigracion no ta posibel pa duna proyeccion cu un grado halto di exactitud.

Den e periodo 2011–2017 a yega en total casi 14.000 inmigrante na e islanan. Desde 2014 e inmigracion tabata como 20% mas abao cu den e tres añanan anterior (2011 – 2013). E inmigracion mas tanto a concentra riba Bonaire. Desde 2014 esakinan pa aña tabata mas o menos mil di promedio, mientras cu un poco menos cu 200 a bay Sint Eustatius y como 300 pa Saba. Te cu 2017 inmigracion a keda aumenta, pero na 2018 esaki a cuminsa baha atrobe. Na Saba y Sint Eustatius probablemente horcan Irma, cu na november 2017 a terorisa region di Caribe, a hunga un papel.

Desde 2011 tabatin anualmente 200 persona naci riba e islanan cu a emigra pa exterior. Ta anticipa cu e salida aki lo mantene su mes na e mesun nivel den e proximo añanan. Basa riba e comportamento di e emigrantenan desde 2011 te cu 2018, ta anticipa mas cu mita di nan lo bolbe na e islanan, mayoria di nan dentro di dos aña. E pronostico ta anticipa anto como 100 inmigrante naci na e islanan cu ta bolbe cada aña.

Pa loke ta e mayoria di inmigrante cu ta bin na e islanan, nan ta bolbe emigra. Sigur na Saba nan ta keda un tempo cortico: casi 90% ta sali atrobe, 60% di nan hasta dentro di dos aña. Esaki lo ta relaciona cu e facilidadnan di enseñansa avansa estableci na e isla. En total e proyeccionnan ta duna cu pa e añanan 2019 – 2029 un cifra di 1.700 inmigrante naci pafo di e islanan, cada aña. Pa e periodo despues di 2030 ta proyecta cu inmigracion pa e islanan lo mengua te yega na un crecemento di cero, na 2050.

E cantidad di habitante na e tres islanan a aumenta den e periodo di 1 di januari 2011 te cu 1 di januari 2019 di 21.000 pa 25.000, un aumento di mas di 2% pa aña. Te cu 2024 ta pronostica un crecemento poblacional cu 2% pa aña pa gradualmente baha te na cero pa 2045. Pa e tempo ey e islanan lo tin mas o menos 33.000 habitante. Bonaire ta haya gran parti di e aumento y a crece mas cu e otro dos islanan. Bonaire lo bay di 20.00 habitante na 2019 pa 27.000 pa 2045. Sint Eustatius ta bay di 3.100 habitante pa 3.800 na 2045. Saba ta spera un crecemento di 1.900 pa 2.400 habitante pa aña 2045.

Desde 2030 e porcentahe di residente no Hulandes lo ta mas halto cu di esnan cu nacionalidad Hulandes, incluyendo esnan naci na e islanan mes.