Abogado Chris Lejuez: Caso di defensa propio no ta comun y no sa ki direccion e caso lo bay

Mirando cu e caso di morto di director di Serlimar Richard Fingal y Sra. Lin ta uno di defensa propio cu a resulta den morto di Sr. Fingal. Keto bay tin hopi speculacion y comentario den comunidad, special den e direccion cu “morto no por papia pa defende su mes”. Abogado Chris Lejeuz ta bisa cu diferente rapport y investigacion haci lo determina e echonan real, aparentemente tin video cu a graba y lo mira contacto entre e dos personanan via telefon.

Bon Dia Aruba a puntra Abogado Chris Lejuez cu ta representa Sra. Lin con comun e ta pa tin casonan di defensa propio aki na Aruba. Los di e caso aki y segun experiencia di Sr. Lejuez. El a splica: “Gewoon caso di defensa propio, no solamente na Aruba ta hopi  no comun, e no ta pasa hopi. El a yega di pasa na Aruba caba, “as a matter of fact” basta aña pasa mi a defende un persona cu a haya su mes  den problema den un bar cerca di mi oficina unda cu na dado momento el a kap un hende cu un machete. E pregunta tabata si el a haci esey den defensa propio of defensa propio cu exceso. Pasobra tin ora, ora cu bo ta defende bo curpa bo ta bay mucho leu, bo por a dal e kisas un sla, pero bo a dal e  dos, tres, cuatro pasobra bo ta perde den locual cu bo ta haci. E dia ey e hues a acepta cu el a uza e machete den defensa propio. E posibilidad ta existi cu e no ta facil pa haya un hues acepta cu ta defensa propio y mi no sa ainda ki direccion fiscal ta bay cu e caso aki.”

Segun Sr. Lejuez a sigui splica den e caso di Sra. Lin lo bay haci un rapport di e persona unda cu ta mira ki lesionnan el a sufri y heridonan cu tin. Lo haci un rapport di e luga mes, con el a keda y kico lo por a sosode. Ta wordo scucha testigonan tambe di tur locual cu nan a tende, como cu tin hendenan pafo cu a tende cierto cosnan. Ta bay wordo mira na video, segun Sr. Lejuez a compronde tin video den e luga cu a graba locual cu a sosode. Pero tambe tin video di unda cu Sra. Lin a busca Sr. Fingal na Four Seas. Ta bay check telefon di e personanan pa wak cuanto contacto nan tabatin cu otro prome, etc. Kiermen tin hopi investigacion ta wordo haci den e caso aki, Sr. Lejuez a termina bisando.