Esunnan cu mester mehora condicion pa economia, ta dispuesto pa scucha?
Siman pasa Camara di Comercio, na ocasion di celebracion di su 85 aniversario, a tuma iniciativa pa trece dilanti, un biaha mas, e tema di e necesidad di mehora condicion pa economia por florece. Esaki principalmente a base di simplifica procesonan di permiso y otro asunto cu un empresa mester tramita cu gobernacion, y tambe simplifica e sistema di impuesto, pa haci esaki mas transparente y simpel pa maneha.
Lamentablemente e mandatarionan invita cu mester tabata presente, esunnan encarga cu Asunto Economico, Asunto General y Financia, no tabata t’ey. Si por a nota presencia di e mandatarionan encarga cu Labor y Husticia, loke tabata di aprecia. Pa no falta obhetividad, mester bisa si cu ministro encarga cu Financia y Recurso Humano, ambos cartera di interes den e debate aki, na otro ocasion sa reuni cu e entidad empresarial importante aki. Pero esun cu realmente ta hiba e batuta den strategia di gobierno, y cu na otro ocasion a expresa su mes na forma ofensivo como invitado di KvK, nos Prome Ministro, a briya pa su ausencia.
Esey no ta kita cu e evento tabatin un bon contenido informativo, tanto den e discurso tradicional di presidente di KvK, y den e speech principal di Xavier Debrun, ehecutivo di Fondo Monetario Internacional, pero presente a titulo personal. Loke Debrun a trece dilanti no tabata un novedad, pero si el a confronta e sala cu e experiencia mundial cu ta indica cu gobernacion transparente, inteligente y stimulante ta contribui na desaroyo economico. Kico ta e cosnan cu ta haci diferencia? Debrun ta menciona por ehemplo: reforma di legislacion laboral pa agiliza empleo, acceso na educacion y bon cuido medico, stimula inversion priva, y stimula y incentiva productividad y innovacion.
Dentro di e itemnan aki ta importante resalta e situacion specifico di Aruba, pasobra tin punto unda nos ta diferencia di otro pais. Den e caso di mercado laboral, no ta asina cu agiliza ley laboral ta haci un diferencia sin mas, si no tin estimulo pa aumenta actividad economico. Y ta aki unda nos pais practicamente nunca a bay den e tereno aki, ya cu e alternativanan economico cu a busca, por ehemplo turismo ora cu industria petrolero a cay afo, a causa un auge economico di mes. Talbes e unico estimulo cu a conoce ta e tax holiday duna na hoteleria, pero nunca tabatin otro estimulo mas general pa economia.
Stimula inversion priva, tanto local como di exterior, ta algo cu ta depende grandemente di e ambiente empresarial cu por crea den un pais. Aki ta toca e temanan cu KvK ta treciendo dilanti pa varios aña caba, cu ta cay bao di dos capitulo grandi: 1) simplifica e procesonan cu tin di haci cu tramite cu empresanan mester haci cu gobernacion; 2) simplifica y crea un sistema di impuesto cu ta stimula inversion, na luga di core cu inversionista. Den esaki ta importante corda cu den henter region gobiernonan ta kibra cabes con pa haya mas inversionista establece na nan pais. Djis keda sinta y pensa cu tur cos ta drecha di mes, no ta un opcion mas. Y ora yega na e tema di con stimula productividad y innovacion, ta haya un porta cera na gobernacion, pasobra no tin idea, ni recurso financiero pa haci algo. Esaki ta algo cu Debrun a enfatisa: no ta cuanto bo ta gasta; ta na kico bo ta gasta esey… Ora tur cos ta bay na paga salario, no tin placa pa inverti.
Debrun ta mustra tambe cu mester tuma ‘ownership’ di e medidanan impopular cu lo mester ehecuta pa drecha e situacion financiero. Esaki ta exactamente loke CFT no mucho tempo atras a recomenda na Prome Ministro den e situacion precario actual. Por cierto cu den ultimo dianan aki por fin nos ta tende Prome Ministro papia tocante e reforma nan fiscal cu eventualmente por tuma luga na fin di aña aki. Di biaha e ta bisa cu no ta sigur ainda kico ta bay sucede y kico no. Con tal cu ainda no ta bin un fin na e incertidumbre pa sector priva, y pa e ciudadano individual, kico por spera na inicio di 2016.
Ora ta papia di e reforma nan necesario, no ta trata di convence e mandatarionan so di un rumbo nobo. Lo mester bay enfrenta un aparato publico cu no gusta cambio y lo bay pone basta obstaculo ora gobierno kier trece cambio, y sigur ora cambio ta significa baha e cantidad di cupo di trabao. Debrun ta mustra riba e importancia di dialogo pa yega na solucion duradero den reforma; reforma forsa ta percura pa un reaccion negativo mas laat den e proceso, loke a lo largo no ta yuda. E medidanan mester tin credibilidad pa crea aceptacion.
E grave di e situacion actual ta cu no ta sinti un boluntad, ni pa restructura gobernacion pa motibo financiero, ni pa mehora servicio na publico, entre nan pa e empresario. Si no bin cambio den esaki, un biaha mas e posicion fuerte cu Camara di Comercio a tuma, lo keda na palabra, nada mas.
