Sindicato STA a tene un reunion cu su miembronan y empleadonan na servicio di Aruba Airport Authority (AAA) cu kier afilia na e sindicato en conexion cu e concepto di e contracto colectivo (CAO) nobo den e sede di SIMAR.
Presidente di STA, Diego De Cuba a declara na Bon Dia Aruba cu nan a presenta e concepto di e contracto colectivo nobo, kiermen awor nan tin cu cuminsa cu e proceso pa negosha un CAO nobo. Pero pa esaki por tuma luga, sindicato tin cu informa e trahadonan prome kico ta bay den e concepto nobo di e CAO.
Aunke tratamento di e CAO den concepto tabata e punto principal den e reunion aki, nan a referi tambe na e ultimo desaroyo cu ta tumando luga den aeropuerto. STA ta fuerte pa negosha e CAO nobo aki, mirando e ultimo desaroyo, caminda sindicato FTA a cuminsa cana e caminda cerca departamento di Mediador di Gobierno pa bin cu un referendum den Triple A.
E sindicalista De Cuba a declara na Bon Dia Aruba cu sindicato STA no tin problema pa FTA pidi pa un referendum pa e trahadonan di aeropuerto. “Tur hende por scoge un sindicato aparte di STA,” el a bisa. Segun presidente di STA nan a yega di pasa den e proceso aki caba den pasado.”
El a splica cu nan a haya un situacion igual cu SEPPA. Nan a yega di bay referendum contra e sindicato aki y nan a gana SEPPA, segun De Cuba. Igualmente el a bisa cu STA tin 15 aña caba cu nan ta negoshando caba den aeropuerto, caminda esaki ta su di cinco CAO cu nan ta negosha pa e trahadonan na servicio di Triple A. Nan ta desea lo miho pa empleadonan di Triple A N.V. y esey ta refleha den e concepto nobo cu nan a presenta na e trahadonan.
Tambe tabatin den pasado otro sindicato cu a yega di pidi referendum den aeropuerto, pero FLOA tambe a perde ‘mahos’ contra STA, el a bisa. Segun De Cuba, e mesun grupo aki cu un par di aña pasa a purba un biaha mas, awor nan ta purbando di drenta cu FTA. E sindicalista a reitera cu ta nan derecho como trahadonan y si STA tin cu bay referendum, e sindicato aki ta dispuesto pa bay referendum tambe. “STA no tin miedo pa bay referendum,” el a declara na e matutino aki.
El agrega cu STA ta masha habri mes y te hasta nan ta contento cu democracia na Aruba ta bibo. Pasobra si esaki no tabata por, e trahadonan lo keda mara henter su bida na un sindicato, y esey no ta e deseo di STA.
CAO nobo ‘cu aumentonan considerabel pa trahadonan’
Durante e reunion cu nan a sostene den e sede di SIMAR, e miembronan di STA presente diahuebs anochi a vota pa asina STA lo por gerencia di AAA cu e concepto nobo pa sinta negosha. E intencion tabata pa yega na un consenso di esnan cu a atende e reunion aki. Sindicalista De Cuba a bisa cu e reunion aki nan a propaganda mas cu un siman pasa. “Kiermen esnan cu a keda sin bin lo tin cu bida cu e decision cu e sala a tuma,” el a bisa.
El a splica cu a base di su experiencia e sa cu mayoria di e miembronan di STA sa cu ora e sindicato aki ta pone ‘un cos ariba mesa, nos no ta pone coy loco ariba mesa.’ Den e concepto di e CAO nobo –segun presidente di STA- nan a bin cu cosnan serio y aumentonan considerabel pa e trahadonan.
Mirando e echo cu Triple A N.V. ta un compania financieramente fuerte, STA kier negosha locual nan ta considera cu ta husto pa e trahado di e compania aki. Esey no kiermen cu STA tin cu pusha nan den un situacion financiero dificil, segun De Cuba.
