Presidente di partido Avanzada Progresista, Henri Falcon, a manifesta cu e ta hibando un lobby na Washington, pa Estadonan Uni lanta e embargo petrolero pa Venezuela y permiti bende crudo cu Merca y otronan, a cambio di alimento pa evita un “hambruna”.
E idea ta pa delibera cu gobierno Mericano tocante un excepcion humanitario (…) pa kita e sancionnan ey y permiti benta di petroleo na Merca o cualkier otro pais bao e condicion ey,” Falcon a bisa den un rueda di prensa, sin duna mas detaye.
E ex Gobernador di estado Lara, cu a enfrenta Nicolas Maduro den eleccion di 20 di mei 2018, a afirma cu su esfuerso ta “financia pa Venezolano,” segun AFP.
“Esey a haci na Irak caba,” Falcon a bisa, indicando cu e recursonan ta dirigi na “cumpra alimento y medicina, pasobra aki por bin un hambruna.”
Falcon a compara su propuesta cu un programa cu a funciona na Irak entre 1996 y 2003, yen di denuncia despues di corupcion. Pa evita e problemanan ey, Falcon ta propone pa haci esaki cu participacion di Nacionnan Uni y Cruz Cora.
Siman pasa tabata circula rumor den prensa cu tabata vincula e agencia di lobby contrata pa Falcon cu supuesto plannan di Falcon pa yega na presidencia, algo cu el a desmenti den e rueda di prensa diahuebs pasa. El a alega cu su intencion ta pa “atende e crisis humanitario.’
El a expresa cu, pa ley, un lobby na Merca mester ta registra cerca Departamento di Husticia. “Esey ta publico, nada scondi,’ el a remarca, sin duna e suma paga pa tal servicio.
Segun Nacionnan Uni, como 7 miyon Venezolano, di un poblacion di 30 miyon, mester di ayudo humanitario urgente.
