E necesidad ainda ta grandi pa atende cu e demanda di cantidad di mucha cu durante e temporada di vakantie ta sinti cu no tin actividad recreativo y educacional apropia pa nan edad. Sinembargo bale la pena remarca e esfuerso cu diferente Centro di Bario, organisacionnan deportivo y social, y tambe fundacionnan ta bin realisando pa medio di nan plan vacacional pa asina mengua un poco e necesidad aki.

Un gran mayoria di e mayornan no tin e posibilidad economico pa bay cu nan muchanan di vakantie pafo di Aruba. P’esey e necesidad di proyectonan of plan vacacional local pa mantene e muchanan activo durante e periodo di vakantie ta uno grandi.

Gerald Franca kende e biaha aki bistiendo su pechi como miembro di Directiva di Fundacion Rancho, pero tambe como Presidente di ASU (Aruba Sport Unie), a relata con ambos organisacion ta bin cu nan propio proyecto vacacional.

Segun Franca, nan ta consciente cu mayoria mayor no tin e manera pa saca e yiunan y hiba nan Orlando, y e muchanan ta keda atras. Hopi mayor ta keha cu kisas no tin mucho di haci na Aruba. P’esey fundacion Rancho, ASU y otro organisacionnan ta poniendo su grano di arena pa atende cu e situacion aki.

Pero e tipo di camp vacacional aki ta uno temporal di un siman maximo dos siman, y despues e muchanan ta fada na cas sin mucho cos pa haci, sino haciendo uzo di video game of smartphone. Franca ta haya hopi importante pa sigui stimula e organisacionnan aki cu ta percura pa e muchanan cu no tin chens pa biaha afo por pasa un vakantie agradabel na Aruba mes.

Sinembargo, si nan no tin e subsidio rekeri, nan no por organisa y bin cu programa vacacional na escala grandi. Den e caso por ehempel di e sport camp organisa pa ASU, e suma cu nan ta pidi no ta ni sikiera un 50% di e costo. E costo real ta casi alrededor di 75 fls pa mucha. Nan tin cu busca subsidio pa cubri e resto di e gasto aki, el a bisa.

Fundacion Rancho

Fundacion Rancho tin un grupo di mucha di 6 pa 11 aña den nan camp di vakantie. Nan tin un programa varia pa e muchanan. E siman aki nan a bay sembra di mangelnan cerca e pier di Rancho den cuadro di Dia Internacional di Conservacion di Mangelnan y Ecosistema. E ta un forma pa sembra e simia di conscientisacion cerca e muchanan riba conservacion di nos ecosistema. Igualmente tin algun charla duna na e muchanan pa rescata y mantene bibo historia y cultura di Rancho.

Un historia cu Franca a conta y cu a hala interes di e muchanan di cu haci cu historia di un bayena. E ta un historia oral cu tempo cu Gerry y e muchanan di su generacion na Rancho –un bario di piscado- a yega di tende di e bieunan. Nan tabata conta con nan a subi e bayena net na e mesun sitio caminda nan a bay planta e mangelnan. Esaki a yega di sosode precies net den e area patras unda e markthallen ta actualmente.

E tempo aya e echo aki a bira un espectaculo, ya cu henter pueblo a bay wak e bayena. Te hasta nan a yega di traha un cantica popular cu ta bisa ‘e bayena a subi tera.’ Den e tradicion oral rond di e episodio di e bayena, Franca a recorda cu como muchanan cu a lanta den Rancho nan a yega di disfruta di e beach chikito aki den e añanan 50 y 60. “E cantidad di muchanan cu a lanta den bario e tempo aya ta mas of menos un 30 pa 40 cu tabata baña eynan, manera e tabata nos piscina,” el a bisa. Nan a lanta hunto, y apesar cu e añanan a pasa, ainda ta existi un amistad grandi den e grupo ey. Nan a lanta un club di amigo y awor yen di nostalgia esunnan cu ainda ta keda ta purbando di rebiba e club aki y nan ta bezig buscando e miembronan di e tempo aya di añanan 60 pa 70.

Franca a declara na Bon Dia Aruba cu nan ta trata di mustra e muchanan kico tabatin den Rancho, y kico a yega di sosode den e bario historico aki. Tambe kico nan tin pensa di trece bek di parti di nos cultura. E ta un manera pa educa e muchanan cu Rancho tabata un centro importante den e desaroyo y aspecto comercial di Aruba.

 

Actividad Deportivo

E actividad di ASU su enfoke ta totalmente otro cu esun di fundacion Rancho. E siman aki nan tabata na Centro Deportivo Frans Figaroa cu un proyecto deportivo pa muchanan di 6 pa 14 aña cu e participacion di 163 mucha. Asina nan ta alivia e necesidad cu ta existi di actividad recreativo durante e temporada grandi di vakantie escolar. Nan tin 22 boluntario cu ta yuda nan, y tambe instructornan di deporte.

Nan a cuminsa cu e proyecto aki mas cu 13 aña pasa. Na principio nan tabata hacie por nada, totalmente gratis. Pero despues nan a cuminsa haya problema cu e parti logistico debi na e presencia iregular di e muchanan. Pa crea un compromiso y pa cubri cierto gastonan, nan a dicidi di cambie pa un suma minimo di 30 fls pa siman.

“E suma aki ta mas pa duna un responsabilidad cu nan tin cu bin tur dia,” el a declara na e matutino aki. Nan ta haya cos di come y bebe, tambe flanel. Tambe nan tin cu paga un seguro pa brinda proteccion na e muchanan cu ta practica deporte den caso di cualkier eventualidad. Igualmente nan ta haci uzo di transporte for di Noord pa San Nicolas pa hiba nan na piscina. E no ta e deporte so sino e ta busca un manera di crea un integracion di e hubentud di Aruba.